Ньурбаҕа «Game mix» оҕолорго аналлаах оонньуур саала арылынна

Ахсынньы 13 күнүгэр, Сэбиэскэй уулуссаҕа баар «Татыйыына» Атыы Киин иккис этээһигэр сокуоннай саастарын туола илик оҕолорго аналлаах «Game mix» оҕолорго аналлаах оонньуур саала арылынна.

Үөрүүлээх аһыллыыга Ньурба улууһун баһылыгын социальнай боппуруостарга солбуйааччы Наталья Петрова, Ньурба куорат баһылыга Геннадий Игнатьев, улуустааҕы социальнай харалта управлениетын салайааччыта Ирина Находкина, Дьарыкт аах буолуу киин салайааччыта Сахая Столярова, СӨ ГБУ «Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо көмөнү оҥоруу комплекснай киин» салайааччыта Марианна Алексеева кытыыны ыланнар, Айылана Афанасьеваҕа үлэтигэр сүбэ-соргу биэрдилэр, аалай лиэнтэни быһыыга кыттыыны ыллылар.
Улуустааҕы социальнай харалта управлениетын салайааччыта Ирина Афанасьевна Находкина:
— Айылана Афанасьева социальнай харалтаҕа социальнай хантараагынан туһанарга сайабылыанньалаах кэлбитэ. Анал хамыыһыйа быһааран, сөбүлэҥин биэрэн, алтынньы 30 күнүгэр биир сылга дуогабардаһан социальнай хантараакка илии баттаспыппыт. Социальнай хантараакка 500 000 солк. көрүллүбүтүттэн, 350 тыһ.солк федеральнай, 150 тыһ.солк. өрөспүүбүлүкэ бүддьүөтүттэн көрүллэн үбүлэннэ. Бу иннинэ Ньурбаҕа эдэр киһи «Grofit» тренажернай саала аһан, дьон дьарыктанар сирдэннэ. Күндээдэ нэһилиэгэр чааһынай бэкээринэ аһыллан, нэһилиэк килиэбинэн, бурдук аһынан хааччыллар буолла. Ити курдук эдэр дьон, маны сэргэ нэһилиэктэргэ социальнай хантараагынан үлэлээн эрэллэрэ хайҕабыллаах дьыала.
Социальнай хантараагынан туһаныан баҕарар киһи бэйэтигэр эбэһээтэлистибэ ылынан үлэлиэхтээх.Социальнай хантараагынан туһанааччы биир сыл иһигэр дьыалатын арынан үлэлээн барыахтаах.

Сокуоннай саастарын туола илик оҕолорго анаан Айылана Александровна сөптөөх киин арыйда дии саныыбын, — диэн түмүктээтэ.
Эдэр биисинэһинэн дьарыктанааччы Афанасьева Айылана:
— Ньурба куоратыгар сокуоннай саастарын туола илик оҕолор сынньанар, бириэмэлэрин атаарар сирдэрэ суох буолан арыйдым.
Виртуальнай, Xboх, Дартс, хоккей, футбол остуол оонньуулара бааллар. Виртуальнай оонньуулар төлөбүрдээх буолуохтара, остуол оонньуулара босхо.
Кэлэр өттүгэр оонньууларбын элбэтэр, бырааһынньыктары тэрийэр аниматордары кытары үлэлэһэр санаалаахпын.
Биисинэс былааммын оҥорорбор «Мой бизнес» киин өйөбүл буолбутугар, улуус дьаһалтатыгар, социальнай харалта управлениетыгар махталбын тиэрдэбин, — тэрээһинтэн санаата көтөҕүллэн түмүктээтэ.

Антонина Семенова

Читайте дальше