Урбаанньыт, «Сити-маркет», «Сити-строй» Атыы кииннэрин хаһаайката Анжелика Александровна Фёдорова Ньурба куорат дьахталларыгар анаан «Город женщин» кулууп тэрийэн үлэлэтэр. Бу иннинэ Анжелика Александровна куорат дьахталларын сэбиэтигэр үлэлээн сылдьыбыт. Эрдэ кинилиин кэпсэтиибитигэр эдэр кыргыттар, дьүөгэлиилэр, орто саастаах ийэлэр Ньурбаҕа түптээн көрсөр сирдэрэ суоҕунан Ньурбаҕа дьахталлар түмсүүлэрин тэрийиэн баҕарарын туһунан этэн аһарбыта. Онтон соторутааҕыта Анжелика Фёдорова саҥа тэриллэн үлэлээн эрэр кулууп туһунан сонунун үллэһиннэ:
— Ньурба куоратын олохтооҕо, куорат дьахталларын Сүбэтин чилиэнэ Анна Александровна Дмитриевналыын өр бүөмнээн, бүөбэйдээн кэлбит баҕа санаабытын толорон, Ньурба куоратыгар саҥа форматтаах «Город женщин» кулууп тэрийдибит.
Аан бастаан алтынньы 28-гар, субуота күн Ньурба куоратыгар сонун тэрээһини Ньурба тыйаатырын сырдык дьиэтигэр тэрийэн ыыппыппыт. 29 араас идэлээх, тус-туһунан интэриэстээх бэйэлэригэр эрэллээх, билиэн-көрүөн баҕалаах кэрэ аҥардар мустан, бэйэ-бэйэлэрин кытта ирэ-хоро кэпсэтэн, саҥа тэриллибит кулууп үлэтин, сыалын-соругун билсистилэр, санаа атастаһыыта киэһэтэ буолбута.
Тэрээһиммит фуршеттан саҕаламмыта, кырасыабай көрүҥнээх, араас начыыннаах минньигэс канапешкалар, битэмииннээх сөрүүкэтэр утахтар көрсүһүүнү олус сэргэхтик ситимнээтилэр. Кэрэ аҥардар кылгас кэмҥэ йога алыптаах эйгэтигэр куустаран, уйулҕа уонна эти-сиини чэбдигирдиигэ эрчилиннилэр.
Бары даҕаны эргиччи интэриэһинэй, төгүрүччү талааннаах кэрэ аҥаардар инники соруктары, былааннары торумнаһан, сурукка тистилэр.
Сэтинньи 11 күнүгэр АЛРОСА дьиэтигэр «Үтүө санаа» көмөҕө кыттыспыттар бастакы «Инвестиции» семинарга барыта 21 кэрэ аҥардар кытыннылар. Инникитин «Город женщин» түмсүү сурунаал таһаарар санаалаах. Кулуупка сылдьааччылар айар хайысхаларынан, дьоҕурдарынан араас маастар кылаас ыытыллалларыгар, араас темалаах көрсүһүүлэргэ «Хartyyna» профессиональнай фотограф кытта сөбүлэҥ түһэристилэр. «Город женщин» саҥа сүүрээн кулууп үрдүк таһымнаахтык үлэтин саҕалаабытынан истиҥ эҕэрдэ буолуохтун,- диэн үөрэ-көтө сонунун үллэһиннэ.
«Город женщин» кулууп үлэтэ сайдарыгар, кэрэ аҥаардар сынньалаҥнарын туһалаахтык атааралларыгар түмсүү тэриллибитэ кэрэхсэнэр эрэ.
Антонина Семенова