Ахсынньы 8-9 күннэригэр Ньурба улууһугар «Настроение АЛРОСА» бэстибээл ыытылынна. Улахан спорт салайааччылара уонна биллиилээх спортсменнар кыттыыны ыллылар: «АЛРОСА» култуурунай-спортивнай комплексын дириэктэрин спорка уонна оҕо сынньалаҥар солбуйааччыта Зелимхан Кцоев, Арассыыйа спортивнай тустуутун Федерациятын толорооччу дириэктэрэ Роман Гайдуков, РФ спордун үтүөлээх маастара, Арассыыйа спортивнай тустуутун Федерациятын көҥүл тустууга отделын салайааччыта Петр Юмшанов, Арассыыйа аан дойдутааҕы кылаастаах спордун маастара, Арассыыйа чөмпүйүөнэ, аан дойду боруонса призера, Д.П.Коркин уонна И.С.Ярыгин турнирдарын элбэх төгүллээх кыайыылааҕа Евгений Жербаев, РФ спордун үтүөлээх маастара, Олимпиада үрүҥ көмүс призера, аан дойду уонна Европа чөмпүйүөнэ Алена Карташова.
Сарсыарда ыалдьыттар улуус баһылыга Алексей Иннокентьевы, тустаах тэрилтэ салайааччыларын кытары көрсөн улууска тустуу сайдыытын тула дьүүллэстилэр.
10 чаастан Антоновкаҕа А.И.Пахомов аатынан спорт комплексыгар ыалдьыттарбыт маастар-кылаастары ыыттылар. Кинилэри кытары көрсөн кэпсэттибит.
Зелимхан Кцоев, АЛРОСА култуурунай-спортивнай комплексын дириэктэрин солбуйааччыта
— “Настроение АЛРОСА” бэстибээли 2017 сыллаахтан спорт араас көрүҥнэригэр тэрийэн ыытабыт. Тустуу – төрдүс көрүҥ буолар. эрдэ Мирнэйгэ, Айхалга, Удачнайга ыытар этибит. Быйыл дириэктэрбит Павел Алексеевич Маринычев көҕүлээһининэн эбии Сунтаарга уонна Ньурбаҕа ыыта сылдьабыт. Фестиваль чэрчитинэн биллиилээх спортсменнары аҕалан эдэр спортсменнарга маастар-кылаастары ыыталлар, сүбэ-ама биэрэллэр.
Будимир Яковлев, РСФСР, СӨ үтүөлээх тренерэ
— Ньурбаҕа биһиги бөлүүн айаннаан кэллибит. Эрчийбит уолум, бастакы үөрэнээччим Петр Петрович Юмшанов кэлэ сылдьар. Арассыыйа спортивнай тустуутун Федерациятын көҥүл тустууга отделын салайааччытынан үлэлиир. Билигин эмиэ Федерация президенинэн өссө 5 сылга тылылынна. Ол иһин кини кэлэрин истэн, ыҥырыытын быһа гыммакка бу кэллим. Бу фестиваль бүтүн Россия үрдүнэн бара турар, бэйэтэ туспа спорт бырааһынньыга буолар. Саха сирин оскуолаларыгар хас даҕаны тустуу кылаастара арылыннылар. Маннык хамсааһыннар тустуу сайдыытыгар улахан оруоллаахтар. Бүгүн Ньурбаҕа Россия тустуутун салайар улахан дуоһунастаах дьон, спорду сэҥээрээччилэр бары киэн туттар биллииллээх спортсменнарбыт кэлэ сылдьаллар.
Алена Карташова, Олимпиада үрүҥ көмүс призера, көҥүл тустууга кыргыттарга Россия сүүмэрдэммит хамаандатын тренерэ
— Улахан тэрээһиҥҥэ кытта сылдьабыт. Биир киэн туттарым диэн Роман Дмитриев тренеригэр дьарыктаммытым буолар. Ньурбаҕа биир даҕаны көҥүл тустуунан дьарыктанар кыыһы, хомойуох иһин, көрсүбэтим. Кыргыттарга көҥүл тустуу эмиэ Олимпийскай оонньуулар биир көрүҥнэрэ буолар, син-биир эр дьон тустуутун курдук улахан суолталаах, мэтээллээх. Манна диэн эттэххэ, кыргыттар тустууга ордук түргэнник үчүгэй түмүктэри көрдөрүөхтэрин сөп. Холобура, эр дьоҥҥо күүстээх утарсааччылар кавказ тустууктара баар эбит буоллахтарына, биһиэхэ суохтар. Онон төрөппүттэргэ туһаайан этиэм этэ, күүстээх-уохтаах, сэниэлээх кыргыттардаах буоллаххытына тустууга биэриҥ, баҕар инникитин элбэх кыайыы өрөгөйүн бириэхтэрэ.
Маннык тэрээһиннэр икки күн устата бараллар. Итини таһынан Н.Н.Чусовской аатынан Антоновка орто оскуолатыгар уонна К.Д.Уткин аатынан Марха орто оскуолатыгар оскуола үөрэнээччилэрэ чөмпүйүөннэри кытта көрүстүлэр.
Эдэр спортсменнар, спорду сэҥээрэр Ньурба олохтоохторо Настроение АЛРОСА бэстибээлтэн олус астыммыттарын, холобур оҥостор чулуу спортсменнара илэ бэйэлэринэн Ньурбаҕа кэлэн маастар-кылаас көрдөрбүттэрин, кинилэри кытары тэҥҥэ дьарыктаммыттарын, автограф-сессия ыыппыттарын өссө даҕаны уһуннук өйдүү-саныы сылдьыахтара.
Лена Петрова