Ахсынньы 8-9 күннэригэр биһиги улууспутугар «Настроение АЛРОСА» бэстибээл ыытыллар. Улахан спорт салайааччылара уонна биллиилээх спортсменнар кэллилэр: «АЛРОСА» култуурунай-спортивнай комплексын дириэктэрин спорка уонна оҕо сынньалаҥар солбуйааччыта Зелимхан Кцоев, Арассыыйа спортивнай тустуутун Федерациятын толорооччу дириэктэрэ Роман Гайдуков, РФ спордун үтүөлээх маастара, Арассыыйа спортивнай тустуутун Федерациятын көҥүл тустууга отделын салайааччыта Петр Юмшанов, Арассыыйа аан дойдутааҕы кылаастаах спордун маастара, Арассыыйа чөмпүйүөнэ, аан дойду боруонса призера, Д.П.Коркин уонна И.С.Ярыгин турнирдарын элбэх төгүллээх кыайыылааҕа Евгений Жербаев, РФ спордун үтүөлээх маастара, Олимпиада үрүҥ көмүс призера, аан дойду уонна Европа чөмпүйүөнэ Алена Карташова.
Бу туһунан улуус баһылыга Алексей Иннокентьев бэйэтин Телеграм-каналыгар суруйда. Бүгүн сарсыарда улуус салайааччылара уонна улуус спордун салайааччылара ыалдьыттары кытта көрүстүлэр, спорт туһунан кэпсэттилэр.
Сарсыарда 10 чаастан Антоновкаҕа А.И.Пахомов аатынан спорт комплексыгар ыалдьыттарбыт маастар-кылаастары ыыта сылдьаллар. Маннык тэрээһиннэр икки күн устата бараллар. Итини таһынан сарсын Н.Н.Чусовской аатынан Антоновка орто оскуолатыгар уонна К.Д.Уткин аатынан Марха орто оскуолатыгар оскуола үөрэнээччилэрэ чөмпүйүөннэри кытта көрсүһүүлэрэ буолуоҕа.
«Ньурба» хаһыат