Бүгүн, ахсынньы 7 күнүгэр, Ньурба оройуонугар Арассыыйаҕа Дьиэ кэргэн, Саха Өрөспүүбүлүкэтигэр Оҕо саас, Саха Өрөспүүбүлүкэтин култууратыгар Оҕо тыйаатырын сылларыгар, Марха (Ньурба) улууһа төрүттэммитэ 200 сылыгар аналлаах, СӨ култууратын үтүөлээх үлэһитэ С.С. Егоров-Оһоокой Сэмэн «Күн Тэгиэримэн Бухатыыр» олоҥхо-испэктээгэ Ньурба тыйаатырын үрдүк сыанатыгар сүрэхтэннэ.
Ньурба дьоно-сэргэтэ, талааннаах оҕолоро, саха норуотун киэн туттуутун, ЮНЕСКО шедеврынан билиниллибит саха Олоҥхотун киэҥ араҥаҕа көрдөрдүлэр. Үгүс киһи үлүмнэһэн үлэлээбит үлэтэ үтүө түмүктэрдээх буолан, бүгүн оҕо олоҥхото өрөгөйдөөтө! Кэнчээри ыччат төрүт үгэстэри тутан хааларыгар, омук быһыытынан сайдар саҕахтарын саргылыырыгар сүҥкэн суолталаах туруорууну көрөөччү дохсун ытыһын тыаһынан уруйдаата-айхаллаата!
Бырайыак ааптара — СӨ култууратын үтүөлээх үлэһитэ, Ил Дархан стипендиата, СӨ Аар Дархан этээччитэ Розалия Тихонова. Туруорааччы режиссер — СӨ култууратын туйгуна Розалия Тартакынова. Олоҥхо-испэктээк сценарийын СӨ Үтүөлээх артыыһа, А.Е. Кулаковскай аатынан Судаарыстыбаннай бириэмийэ лауреата, Арассыыйа култууратын Үтүөлээх үлэһитэ Афанасий Федоров суруйда. Режиссер сүбэһитэ — СӨ ускуустубатын Үтүөлээх диэйэтэлэ, Судаарыстыбаннай бириэмийэ лауреата Александр Титигиров. Режиссер көмөлөһөөччүтүнэн Култуура департаменын үлэһитэ Нюргуяна Хахырова, көстүүм худуоһунньугунан «УЛУУ» таҥас, киэргэл бренд ааптара Марина Андреева үлэлээтилэр.
Ньурба оройуонун оскуолаларын оҕолоро биир санаанан салайтаран, ис сүрэхтэриттэн кыһаллан, сыраларын ууран туран оруолларын толордулар. Инникитин даҕаны бу сатабылгытын ыһыктыбакка, саҥаттан-саҥа бырайыактарга кыттан, үөрэтэн-чинчийэн, сайыннаран, саха норуота сахабын дэнэр саргытын салайсар дьон буола үүнүөххүт-сайдыаххыт диэн эрэнэбит!
Талба талааннаах оҕолорбутун уһуйбут, чочуйбут, эрчийбит уһуйааччыларбытыгар Анна Матвееваҕа, Изабелла Ефимоваҕа, Айна Семеноваҕа, Джип Захаровка, Адыльбек Искаковка, Алексей Михайловка, Нюргуна Хахыроваҕа, Елена Ушницкаяҕа, Петр Белолюбскайга истиҥник махтанабыт!
Хас биирдии улахан бырайыак тарбахтарыгар талааннаах дьоммут көмөтө суох кыаллыбат. Ол курдук, биһиги уустарбыт: СӨ норуотун маастардара Евгений Иванов, Ариан Афанасьев-Арыйаан Уус, СӨ уус-уран оҥоһуктарын маастара Иван Саввинов, Нурба оройуонун уус-уран оҥоһуктарын маастара Арсений Иванов, иистэнньэҥнэрбит: Ньурба оройуонун уус-уран оҥоһуктарын маастардара Марина Андреева, Фекла Иванова, Лидия Терехова, Екатерина Степанова, ону тэҥэ, талба талааннахтар Таисия Кучурова, Лариса Алексеева, Вера Максимова, Марфа Федорова, Мария Федорова, Любовь Григорьева, Нюргуяна Степанова, Виолетта Попова, Оксана Давыдова, Ирина Михайлова, Розалия Оппудонова, Ганна Николаева күүс-көмө буолбуттарыгар үгүрү-сүгүрү буоллун!
Бүгүҥҥү кэрэ тэрээһиҥҥэ СӨ уус-уран оҥоһуктарын маастара бэлиэ Мира Никитична Алексееваҕа, Ньурба оройуонун уус-уран оҥоһуктарын маастара бэлиэ Лариса Николаевна Алексееваҕа туттарылыннылар! Көмүс тарбахтаах иистэнньэҥнэрбитин ис сүрэхтэн эҕэрдэлиибит!
Түгэнинэн туһанан, Ньурба оройуонун дьаһалтатыгар, Ньурба оройуонун Үөрэҕирии салалтатыгар, Ньурба оройуонун ыччат дьыалаларыгар уонна имиджевай бэлиитикэ салалтатыгар, Ньурбатааҕы Судаарыстыбаннай тыйаатыр, Ньурбатааҕы оҕо ускуустуба оскуолатын, Н.И. Харитонов-Николай Чуор аатынан «Кыталык» култуура дыбарыаһын, Ньурбатааҕы кииннэммит библиотека ситимин, Ньурбатааҕы К.Д. Уткин аатынан түмэл, нэһилиэктэрбит сынньалаҥ кииннэрин кэлэктииптэригэр дириҥник махтанабыт! Өрүү бу курдук тутуспутунан өссө саҥа бырайыактары олоххо киллэриэххэ, сайдар саҕахтары саҕыахха!
«Күн Тэгиэримэн Бухатыыр» олоҥхо-испэктээги ахсынньы 17 күнүгэр, киэһэ 18 чааска, Үүнэр көлүөнэ тыйаатырыгар Дьоллоох Дьокуускай куорат олохтоохторугар уонна ыалдьыттарыгар көрдөрүөхпүт. Биир дойдулаахтарбыт кэлэн көрөн, оҕолорбутун уруйдуу-айхаллыы көрсүөҕүҥ!
Ньурба култуурата