🌷🌷🌷Кулун тутар 20 күнүгэр Н.И.Харитонов-Чуор аатынан «Кыталык» култуура дыбарыаһыгар Ньурба оройуон дьахталларын отчуоттуур-быыбардыыр кэмпириэнсийэлэрэ буолла.
👩👩🦱👩🦰Сарсыардаттан дискуссионнай былаһааккалар үлэлээтилэр. Ол курдук Ньурба оройуонугар дьахталлар дьарыктаах буолууларыгар анаан көмөнү оҥорууга Дьарыктаах буолуу киин салайааччыта Сахая Столярова, төрөппүттэр эппиэтинэстээх буолууларыгар «Ньурба куорат» МТ дьаһалтатыттан Мария Куличкина салайар дискуссионнай былаһааккатыгар «Айар» кинигэ кыһатыгар Дьоруой ийэлэргэ аналлаах «Билии аартыгын арыйааччылар» сабыс-саҥа кинигэ ааптардара — СӨ үөрэҕириитин туйгуна, Арассыыйа уопсай үөрэхтээһин бочуоттаах үлэһитэ Анастасия Донская, улуустааҕы үөрэҕирии салаатын каадыр боппуруостарыгар кылаабынай исписэлииһэ Варвара Прокопьевна Васильева кинигэни билиһиннэрдилэр.
Дьахтар ийэ буолуутун, дьахталларга искэн ыарыы тарҕаныытын туһунан улуустааҕы киин балыыһаттан Дария Иванова, Ньурбатааҕы ГТАС исписэлииһэ Инга Никифорова 2021-2023 сыллардааҕы демографияны билиһиннэрдэ. «Барыта бэйэбит илиибитигэр» психологическай уонна доруобуйаҕа туһалаах хамсаныылары Туяра Алексеева оҥоттордо.
Отчуоттуур-быыбардыыр кэмпириэнсийэ аһыллыытыгар улуус баһылыга Алексей Иннокентьев, улуус баһылыгын социальнай боппуруоска солбуйааччыта Наталья Петрова, «Ньурба куорат» МТ баһылыга, улуустааҕы Аҕалар түмсүүлэрин бэрэссэдээтэлэ Геннадий Игнатьев, улуус Сүбэтин бэрэссэдээтэлэ Нюргуяна Михайлова кыттыыны ыллылар.
Быыбар хампаанньатын үлэтэ үрдүк таһымнаахтык барарыгар кыһамньылаах үлэтин иһин, РФ Киин быыбар хамыыһыйатын Махтал суругун Оксана Даниловаҕа улуус баһылыга Алексей Иннокентьев туттарда. Салгыы Ньурба оройуонугар дьахтар хамсааһынын сайдыытыгар кылаатын иһин Ньурба оройуонун дьахтар сэбиэтин 2019-2024 сс. салайан үлэлэппит Альбина Ермолаеваҕа, 2014-2024 сс. Ньурба куорат дьахтар сэбиэтин салайан кэлбит Майя Николаеваҕа, оройуоҥҥа дьахтар хамсааһынын сайдыытыгар тус кылаатын иһин Светлана Гаврильеваҕа, Октябрьскай нэһилиэк дьахтар сэбиэтин бэрэссэдээтэлигэр Нюргуяна Матвееваҕа Бочуотунай суруктары, 👨👩👦👦👨👩👦👦төрдүс уонна онтон кэлэр оҕотун төрөөбүт ийэлэргэ дьиэ кэргэҥҥэ 100 000 солк. суумалаах «Ньурба дьиэ кэргэнэ» МО сэртипикээттэри үөрүүлээх быһыыга-майгыга Ньурба улууһун аҕа баһылыга Алексей Михайлович туттартаата.
Маны сэргэ быйыл Арассыыйаҕа Дьиэ кэргэн сылынан, 50 сыл бииргэ олорбут Малдьаҕар нэһилиэгин олохтоохторугар Валентин Николаевич уонна Мария Дмитриевна Самсоновтарга, Таркаайы нэһилиэгин Хатыҥ Сыһыыттан Михаил Николаевич уонна Фаина Петровна Мостаховтарга, Ньурбачаан нэһилиэгиттэн Попов Василий Дмитриевич кэргэнэ Егорова Розалия Николаевнаҕа үөрүүлээх быһыыга-майгыга эҕэрдэ суруктары туттартаата. ГТАС исписэлииһэ Инга Ивановна үөрүүлээх быһыыга-майгыга «Килбиэннээх дьиэ кэргэн» бэлиэни, Ил Дархан Айсен Николаев эҕэрдэ суругун туттарда.
Оройуоннааҕы дьахтар сэбиэтин бэрэссэдээтэлэ Альбина Семеновна Ермолаева 2019-2024 сс. үлэтин отчуоттаата. Хаҥалас нэһилиэгиттэн Хаҥаластааҕы дьахтар сэбиэтин бэрэссэдээтэлэ Елизавета Антонова нэһилиэккэ дьахтар хамсааһынын үлэтин кэпсээбитин, видеоролик көдөрбүтүн кэмпириэнсийэ кыттыылаахтара биһирии иһиттилэр. 👏👏👏
Ньурба оройуонугар саҥа дьахтар сэбиэтэ талылынна. Ньурба оройуон дьахтар Сэбиэтин бэрэссэдээтэлинэн улуус Сүбэтин бэрэссэдээтэлэ Нюргуяна Михайловна Михайлова биир санаанан талылынна. Дьахтар Сэбиэтин президиумугар: «Ньурба оройуон» МО баһылыгын социальнай боппуруоска солбуйааччыта Наталья Семеновна Петрова, «Сайдыс» ийэлэр кулууптарын салайааччыта Татьяна Егоровна Александрова, улуус Сүбэтин дьокутаата Валерия Гаврильевна Владимирова, «Кыталык» култуура дыбарыаһын дириэктэрэ Самангади Базарсадаевна Дондокова, «Октябрьскай нэһилиэк» МТ дьокутаата Надежда Васильевна Егорова, Ньурба оройуон уопсастыбаннай сэбиэтин бэрэссэдээтэлэ Майя Олеговна Николаева, «Ийэ дойду» анал байыаннай дьайыы дьиэ кэргэннэрин кэмитиэтиттэн Варвара Георгиевна Плотникова, салайааччы дьахталлар кулууптарын салайааччыта Розалия Михайловна Тихонова, «АйЛи» кулууп салайааччыта Айталина Витальевна Фёдорова, «Город женщин» кулууп салайааччыта Анжелика Александровна Фёдорова, «КөмүсКэл» волонтердар иистэнэр сыахтарын салайааччыта Галина Дмитриевна Фёдорова талылыннылар.
Улуустааҕы дьахтар сэбиэтин саҥа састааба
Дискуссионнай былаһаакка үлэлэрин түмүгүнэн, резолюция ылыныытыгар кэмпириэнсийэ кыттыылаахтара сөбүлэҥнэрин биэрэн куоластаатылар.
Ньурба куорат бэйэ дьыалатынан дьарыктанааччылар, урбаан эйгэтигэр үтүө холобуру аҕалар «Город женщин», «АйЛи» түмсүү салайааччылара Анжелика Федорова, Сардана Аввакумова түмсүүлэрин үлэтин билиһиннэрдилэр.
Улуустааҕы Дьарыктаах буолуу киин салайааччыта Сахая Макимовна Столярова Дьарыктаах буолуу киинин аатыттан «Хорула нэһилиэгэ» МТ кылаабынай исписэлииһигэр Наталья Александровна Румянцеваҕа, ИП Спиридонова Евгения Георгиевнаҕа Махтал суруктары туттартаата.
Бүгүҥҥү тэрээһин уопсай хаартыскаҕа түһүүнэн түмүктэннэ.
Антонина Семенова