Бүгүн, атырдьах ыйын 17 күнүгэр, улууска кэтэһиилээх саҥа диализнай клиника үөрүүлээхтик аһылынна. Бэлиэ тэрээһиҥҥэ улуус баһылыга Алексей Иннокентьев, СӨ Ил Дарханын уонна Бырабыыталыстыбатын Дьаһалтатын олохтоох салайыныы боппуруостарыгар департаменын салайааччытын солбуйааччыта Афанасий Старостин, Ил Түмэн сис кэмитиэтин бэрэссэдээтэлэ Владимир Прокопьев, СӨ Ил Дарханын сүбэһитэ Георгий Балакшин, Дьокускайдааҕы «Нефроклиника» ХЭТ салайааччыта Марфа Бурцева уо.д.а. кытыннылар. Манна үлэлэспит дьоҥҥо Махтал суруктар туттарылыннылар, медперсоналга үлэтигэр ситиһиилэри баҕаран элбэх истиҥ-иһирэх тыллар этилиннилэр.
Улуус салалтата диализнай киини улуустааҕы бибилэтиэкэ уонна К.Д.Уткин аатынан түмэл үлэлии олорор дьиэтигэр олохтуурга анаан үп көрүнэн, бастакы уонна иккис этээстэргэ хапытаалынай өрөмүөн ыыттарбыта. Үлэни кэмигэр «Стройкомфорт» ХЭТ түмүктээбитэ. Аналлаах медицинскэй оборудование кэлэн туруоруллан, медперсонал туһааннаах үөрэҕи ааһан, саҥа эмп тэрилтэ үлэлээн барарга номнуо бэлэм буолла. 10 искусственнай бүөр аппарааттаах саҥа эмп тэрилтэтэ улууспут ыарыһахтарын эрэ буолбакка, ыаллыы Сунтаар уонна Үөһээ Бүлүү олохтоохторун эмиэ көрүөҕэ-истиэҕэ. Улууска терминальнай стадиялаах 20 бүөр ыарыһах баар, итини сэргэ ыаллыы улуустары аахтахха, маннык көмөҕө 70-тэн тахса киһи наадыйар. Бу ый бүтүүтүн диэкки диализнай киин бастакы ыарыһахтарын эмтээбитинэн барыаҕа. Онон бүгүн улууспутугар улахан үөрүүлээх тэрээһин суолтата улахан.
Геннадий АНТОНОВ.