Бүгүн, ахсынньы 1 күнүгэр, киэһэ 5 чаастан «Кыһын Саха сириттэн саҕаланар» бэстибээл чэрчитинэн бастакы Саҥа дьыллааҕы харыйа уотун үөрүүлээхтик уматыы бэлиэ тэрээһинэ ыытылынна.
Ст.Васильев болуоссаты толору мустубут дьону улуус баһылыгын аатыттан баһылык солбуйааччыта Наталия Петрова, куорат баһылыгын солбуйааччы Павел Необутов, онтон Тымныы оҕонньоттор истиҥник эҕэрдэлээтилэр, үтүөнү баҕарыыларын тиэртилэр.
Сүргэлэрэ көтөҕүллүбүт оҕо-аймах уонна улахан дьон үөрүүлээх күйгүөнүн ортотугар Саҥа дьыллааҕы харыйа уота күлүмүрдүү-сандаара тыкта. Саҥа дьыллааҕы хоробуот тэрилиннэ, өрөгөйдөөх ырыа-муусука дьиэрэйдэ.
Бу киэһэ Тымныы оҕонньотторго оҕолор баҕа санааларын суруйбут истиҥ-иһирэх тыллардаах суруктарын туттардылар.
Геннадий Антонов