Алтынньы 27 к. Ньурба к. Сэбиэскэй уул. 74 №-гэр турар дьиэҕэ кэргэннии Василий уонна Күөрэгэй Егоровтар «Егофит» саҥа тренажернай сааланы арыйдылар. Үөрүүлээх тэрээһиҥҥэ улуустааҕы урбаан, эргиэн уонна олохтоох оҥорон таһаарыы департаменын салайааччыта, улуус баһылыгын ис бэлиитикэҕэ солбуйааччыта Михаил Пан, Ньурба к. баһылыгын солбуйааччыта Павел Необутов, улуустааҕы социальнай көмүскэл управлениетын салайааччыта Ирина Находкина, куорат олохтоохторо кытыннылар. Аалай лиэнтэ үөрүүлээхтик быһылынна, үтүө түгэн үөрүүтүн үллэстэ кэлбит ыалдьыттары хаһаайыттар фуршетынан көрүстүлэр, төлөпүөн нүөмэрдэринэн сүүйүүлээх оонньуу ыытылынна, түмүгүн бу киэһэ таһаарыахтара.
Тренажернай саала дириэктэрэ, биир дойдулаахпыт Василий Афанасьевич Егоров соцконтрагынан ылбыт 500 тыһ. солк. өссө элбэҕи эбэн, сааланы тренажернайга сөп түбэһиннэрэн улахан суумаҕа өрөмүөннэппит, Москваттан элбэх оборудованиены аҕалан туруорбут. Кини кэргэнэ, билигин көстө турар «Сайда тур, Сахам сирэ» киинэ биир сүрүн героинятын, «Саха» НКИХ ыытааччытын Ирманы оруолун оонньообут Күөрэгэй Егорова хомуска олус үчүгэйдик оонньоон бу тэрээһини киэргэттэ.
Киһи тилэҕиттэн саҕалаан төбөтүгэр тиийэ эти-сиини эрчийэргэ аналлаах аныгы оборудованиенан толору хааччыллыбыт тренажернай саала дьону күүтэр. Сиһилии «Егофит» саҥа тренажернай саала туһунан улуус хаһыатын нүөмэригэр ааҕыаххыт.
Геннадий Антонов