2022 сыл бэс ыйын 28 күнүгэр ылыллыбыт 221 нүөмэрдээх Федеральнай Сокуоҥҥа олоҕуран, 2024 сыл кулун тутар 1 күнүттэн ынах сүөһүнү, сылгыны, көтөрү маркировкалааһын, учуокка туруоруу булгуччулаах буолла.
Ол аата, ынах сүөһү, сылгы, дьиэ кыыла барыта хаһаайыстыба көрүҥүттэн тутулуга суох маркировкаланар. Сүөһүгэ бииркэ икки араастаах буолар: улахана ыраахтан көрөргө табыгастаах, биэс нүөмэрдээх, оттон кырата анал тэрилинэн (сканерынан) ааҕыллар, бу 15 нүөмэрдээх буолар. Сылгыга тириитин иһигэр угуллар микрочип буолар, кулгаахтарыгар иилиллэр анал бэлиэ суох, манна сканерынан эрэ ааҕыллар. Нүөмэрдэрэ кыылы-сүөлү учуоттуур Регагро уонна Хорриот судаарыстыбаннай систиэмэҕэ киирэр. Онно бу сүөһү ханнык быһыыны ылбыта, сааһа, боруодата, хаһаайына кимэ барыта ыйыллар.
Маркировка үлэтин ыытыы күнэ-дьыла Российскай Федерация Бырабыыталыстыбатын 550 нүөмэрдээх Уурааҕар олоҕуран ыйылла сылдьар. Ол курдук, тэриллиилээх уонна бааһынай хаһаайыстыбалар ынах сүөһүлэрэ уонна сылгылара бу балаҕан ыйынан маркировкаланан бүтүөхтээх, оттон кэтэх хаһаайыстыбалар ынах сүөһүлэрэ — балаҕан ыйынан, сылгылара – кэлэр сыл кулун тутарынан түмүктэниэхтээх. Билигин Ньурба улууһугар ынах-сүөһүнү бииркэлээһинигэр быйылгы төрүөх ньирэй эрэ хаалан турар, түмүктэнэрин сыһыыга бэйдиэ сылдьаллара атахтыыр.
Эрдэ өрөспүүбүлүкэ бюджетыттан бииркэ атыылаһыыга үп-харчы көрүллүбүт буоллаҕына, бу сылтан үбүлээһин көрүллүбэтэ. Ньурбатааҕы бэтэринээринэй сулууспа «РегАгро» тэрилтэни кытары сөбүлэҥ түһэрсэн, сылгыга уонна ньирэйдэргэ бииркэ атыыласта. Онон, маркировка үлэтэ төлөбүрдээх өҥө быһыытынан оҥоһуллар буолуоҕа.
Сүппүт сүөһүлэрин буларга сүөһү кулгааҕар иилиллэр чииптээх нүөмэрдэр олус табыгастаахтарын хаһаайыстыбалар сэҥээрэн, билигин улгумнук бииркэлээһини ыыттарар буоллулар.
Сүөһү иитээччилэргэ тэттик сүбэлэр:
— кулгаахтарыгар баар бииркэлэрин нүөмэрин сурунан ылыҥ, хаартыскалаан.
— өскөтүн кулгаахтарын бииркэлэрэ түһэр түгэнигэр, сылдьыбыт сиригэр бэлиэ баайын, түспүт нүөмэрдээх бииркэтин чөкө уурунуҥ.
— идэһэ буолбут эбэтэр сүппүт сүөһүлэргитин бэтэринээрдэргэ этэҥҥит РегАгро уонна Хорриот ситимнэриттэн таһаартарын.
Ветеринарнай сулууспа