Бүгүн улуус баһылыга Алексей Иннокентьев «Сибтрансстрой» ХЭТ генеральнай дириэктэрэ Владислав Евгеньевич Петрову кытта көрүстэ. Ол туһунан кини бэйэтин Телеграм каналыгар суруйда.
«Сибтрансстрой» ХЭТ Ньурба куоракка сууккаҕа 1200 кубометр ууну сир анныттан хачайдаан таһааран ыраастыыр ыстаансыйаны тутуохтаах. Эбийиэк Вертолетка микро-оройуонугар тутуллар, «Ыраас уу» национальнай бырайыак чэрчитинэн үбүлэнэр. Уопсай сыаната — 510 мөл. солк. Бу ыйга «Сибтрансстрой» ХЭТ сыбаайа түһэрэргэ анаан сири дьөлө үүттүүр үлэлэрин саҕалыаҕа, онтон сыбаайалара түһэриллиэҕэ.
Ньурба дьонугар-сэргэтигэр олус наадалаах, улахан кыамталаах ууну ыраастыыр ыстаансыйа бу сыл бүтүүтэ үлэҕэ киириэхтээх, диэн суруйар улуус баһылыга.
«Ньурба» хаһыат.