Сэтинньи 3 күнүгэр Ньурба оройуонун Култуураҕа департаменын Олоҥхо Дьиэтигэр Ньурбачаан түөлбэтигэр төрөөн-үөскээн, үлэлээн-хамнаан, ыллаан-туойан ааспыт норуот ырыаһыта, оһуокайдьыта, Ньурбачаан нэһилиэгин убаастанар киһитэ Егорова Дария Гаврильевна-Ырыа Даарыйа төрөөбүтэ 100 сылын бэлиэтиир оһуокай киэһэтэ ыытылынна.
Сэтинньи 1 күнүгэр Ырыа Даарыйа 100 сылын туолар күнүн баттаһа, Ньурбачаан нэһилиэгэр аймахтара уонна култуура киинин үлэһиттэрэ тэрийэн, бэт истиҥ тэрээһин ыытыллыбыта. Ньурбабыт фольклористара, төрүт култуураны өрө туппут дьоммут Култуура департаменыттан Дора Бурнашева, Ньурбатааҕы Судаарыстыбаннай тыйаатыртан Прокопий Федоров, «Кыталык» КД Розалия Николаева, Таисия Кучурова, Татьяна Горохова кэрэ киэһэни талба талааннарынан киэргэппиттэрэ.
Бүгүн Ырыа Даарыйаҕа анаммыт тэрээһин Ньурба оройуонун Култуураҕа департаменын салайааччыта, Саха Өрөспүүбүлүкэтин култууратын үтүөлээх үлэһитэ, Ил Дархан стипендиата, СӨ Аар Дархан этээччитэ Розалия Михайловна Тихонова эҕэрдэ тылынан саҕаланна. Устар ууну сомоҕолуур уран тыллаахтар, олорон ааспыт кэрэ кэмнэрин сырдатар, үйэтитэр үлэни иилээн, таһаарыылаахтык тэрийбиттэринэн, Ньурбачааннааҕы култуура киинин үлэһиттэригэр уонна нэһилиэк көхтөөх олохтоохторугар махтал сурук туттарылынна.
Ырыа Даарыйа олорон ааспыт олоҕун кэпсиир быыстапка, олоҕун оҥкулларынан музыкальнай нүөмэрдэр көрдөрүлүннүлэр. Маны сэргэ, элбэх сылаас тыллаах истиҥ кэпсээннэри иһиттибит. Ол курдук, Даарыйа туһунан истиҥник балтыта, норуот маастара, «Сүүтүк» иистэнньэҥнэр түмсүү салайааччыта Розалия Николаевна Попова, эдэр саастарыгар ыаллаһан олорбут дьоно, Маар олохтоохторо Валентина, Евгений Федоровтар, бииргэ оһуокайдаан ааспыт үөлээннээҕэ Арассыыйа, СӨ доруобуйатын харыстабылын туйгуна, СӨ үтүөлээх бырааһа, Дархан этээччи Иван Григорьевич Ушканов, итиэннэ Даарыйа чугас дьүөгэтэ, ыала, биир түөлбэттэн төрүттээх Егорова Александра Нестеровна (Өлөксөөн) сиэнэ, Мясоедова Александра Валерьевна истиҥник ахтан аастылар.
Кинилэр бары Даарыйа Гаврильевна үлэни кыайарын-хоторун, киһи быһыытынан үтүөтүн, кыһамньылааҕын бэлиэтээтилэр. Мустубут дьону Алена Иванова, Дора Бурнашева, Саргылаана Семенова ылбаҕай ырыалара, Арассыыйа, СӨ доруобуйатын харыстабылын туйгуна, СӨ үтүөлээх бырааһа, Дархан этээччи Иван Григорьевич Ушканов, СӨ үтүөлээх этээччилэрэ Таисия Кучурова, Дмитрий Колесов оһуокайдара, Туяра Саввинова тохтор тойуга ситэрэн-хоторон биэрдэ.
Бу киэһэ мустубут дьону барыларын сахалыы сандалы мааны аһынан-үөлүнэн Ырыа Даарыйа балтыта Розалия Николаевна Попова уонна «Сүүтүк» түмсүү иистэнньэҥнэрэ, күндүлээтилэр-маанылаатылар. Айылҕаттан анаммыт сүдү талааннаах киһибит Егорова Дария Гаврильевна — Ырыа Даарыйа олорон ааспыт олоҕун истиҥник ахтан-санаан ыллыбыт. Кэлэр да кэмнэргэ кини сырдык аата кыыс оҕо кэпсээнигэр, уол оҕо тойугар туойулла туруохтун!
Ньурба култуурата