Хас биирдии оҕо кыра эрдэҕиттэн ханнык көрүҥҥэ дьоҕурдааҕын көрөн, сөптөөх дьарык ыытан, инникитин спорт эйгэтигэр буһан-хатан спортсмен быһыытынан үүнэн-сайдан тахсарыгар сүҥкэн оруоллаах. Биһиги Ньурбабыт улууһугар художественнай гимнастика көрүҥэ оҕону уһуйаан сааһыттан дьарыктаан, 2021 сылтан Мария Алексеевна Александрова салалтатынан үлэлиир.
Мария Алексеевна бэйэтэ Антоновкатааҕы оҕону сайыннарар киин «Ромашка» уһуйаанын иитээчитинэн, билигин эбии үөрэхтээһин педагогунан үлэлиир. Номнуо икки сыл иһигэр кырачаан спортсменнарбыт ситиһиилэрэ үгүс. Бу художественнай гимнастика көрүҥэ төрөппүттэр, дьарыктанар оҕолор, улуус салатата болҕомтолорун, интэриэстэрин тардан улууспут иһигэр бу көрүҥҥэ федерация тэриллэн, бу дьыл муус устар ый 2 күнүгэр оройуоннааҕы художественнай гимнастикаҕа маҥнайгы аһаҕас турнир ыытыллыбыта.
Сэтинньи 11 күнүгэр Ньурба куоратын «Кыталык» КД бу художественнай гимнастикаҕа дьарыктанар оҕолор «Авокадо» оҕону эбии дьарыктыыр киин отчуоттуур кэнсиэрэ ыытылынна. Кэнсиэргэ толору зал дьон мустан, оҕолор талааннарын бары да сөҕө-махтайа көрдүбүт. Салайааччы сатабыллааҕа, төрөппүттэр бары биир киһи курдук тутуспутунан өйөбүл буолаллара тута көстөр. Оҕолор икки сыллаах ситиһиилэрин түмэн, фотосессия оҥорон, хаартыскаларын иилэн быыстапка, фотозона оҥорон тэрээһини өссө сэргэхситтилэр. Тэрээһиҥҥэ улуус баһылыгын солбуйааччыта Наталья Петрова, улуустааҕы физическэй култуура уонна спорт управлениетын салайааччыта Роберт Алексеев, «Октябрьскай нэһилиэк» муниципальнай тэриллии баһылыгын солбуйааччыта Александра Иванова, төрөппүттэр эҕэрдэ тыл этэн оҕолорго, салайааччыга эҕэрдэ сурук туттартаатылар. Ньурба улууһун художественнай гимнастика федерациятын салайааччытын Валерия Владимирова аатыттан төрөппүттэргэ махтал сурук туттарылынна.
Биһиги улууспутугар биир олимпийскай көрүҥнэртэн биирдэстэрэ художественнай гимнастиканы салайан ыытар тренер-преподаватель Мария Алексеевнаны көрсөн, санаатын иһиттибит:
«Мин маҥнай 2021 сыл сэтинньи ыйга «Авокадо» оҕону эбии дьарыктааһыҥҥа ритмика куруһуогун үлэлэтэн саҕалаабытым. Онтон муус устар ыйга Хаҥалас улууһугар художественнай гимнастикаҕа күрэх буоларын истэн, онно оҕолорбун бэлэмнээн кыттыыны ылан устунан бу көрүҥү сөбүлээн дьарыктаан барбытым.
Бастаан саҕалыырбар 30 иитиллээччилэрдээх буоллахпына, күн бүгүн 110 оҕо дьарыктанар, биир көмөлөһөөччү тренердээхпин. Икки сыл иһигэр Дьокуускай куоракка — 5, Покровскайга — 1, Московскай уобалас Одинцово куоратыгар ыытыллыбыт «Зимняя сказка», Москва куоракка ыытыллыбыт «Грация» күрэхтэргэ кыттыыны ыллыбыт
30 оҕом иккис уонна үһүс юношескай спортивнай разрядтары толордулар. Былырыын Александра Андреевна Бронских уонна Татьяна Кирилловна Шишигина салалталаах Ньурбаҕа сүүмэрдиир дьарыктар ыытыллыбыттара. Бу дьыл кулун тутар ыйга СССР спордун маастара, республикабыт художественнай гимнастика сүүмэрдэммит хамаандатын тренерэ Татьяна Кирилловна Шишигина салалтатынанан ыытылынна. Бэс ыйыгар Саха сириттэн бастакынан Ирина Винер оскуолатыгар үөрэммит гимнасткабыт, билигин Москва куоракка маҥнайгы нүөмэрдээх художественнай гимнастика киинин тренерэ Никифорова (Иванова) Виолетта Семеновна кэлэн сбор ыыппыта. Олус талааннаах оҕолор баалларын бэлиэтээн 5 оҕону Москва куоракка дьарыкка ыҥыртаабыта.
Сорох оҕолор айылҕаттан имигэс, сорохтор наһаа баҕалаах дьаныардаахтык дьарыктанан ситиһии үктэлин дабайар оҕолор бааллар. Онтон мин хас биирдии иитиллээччилэрим кыра да күннээҕи ситиһиилэриттэн сүрдээҕин үөрэбин, саамай сатаабат оҕо кэлэн сатаатаҕына, бу мин үлэм түмүгэ — диэн икки бүк үөрэбин. Инникитин өссө сайдан, элбэх оҕону хабан, кэҥээн үлэлиир баҕалаахпын. Үгүс улахан первенстволарга кыттыыны ылан, оҕолорум спортивнай разрядтары толорон инникитин үрдүк ситиһиилэр кэлэ туралларыгар баҕарабын» -диэн санаатын үллэһиннэ.
Икки сыл иһигэр сүүстэн тахса оҕону дьарыктыыр, үөрэтэр, Арассыыйа таһымнаах күрэхтэргэ кытыннарыы, сбордары тэрийэн ыытыы диэн улахан ситиһии буолар. Баҕалаах оҕолору хабан, төрөппүттэр чугастыы нэһилиэктэртэн кытта оҕолорун аҕалан дьарыктаталлар. Элбэх оҕолоох Октябрьскай нэһилиэк олохтоохторо, Софроновтар дьиэ кэргэттэриттэн үс кыыстара художественнай гимнастиканан сөбүлээн дьарыктаналлар. Кинилэр ийэлэрэ Мария Демьяновнаны уонна «Авокадо» оҕону эбии дьарыктыыр киин аһыллыаҕыттан сылдьар Н.Н. Чусовской аатынан Антоновка орто оскуолатын 4 кылааһын үөрэнээччитэ Зоя Софроноваттан санааларын иһиттим.
«Мин «Авокадо» аһыллыаҕыттан иккис сылын сылдьабын, элбэх саҥаны биллим, үөрэнним. Бастаан Дьокууйскай куоракка баран ОФП кыттаммын 1 миэстэ буолан наһаа үөрбүтүм. Онтон былырыын ахсынньыга Москваҕа баран, ОФП бөлөҕүнэн уонна биирдиилээн прогамманнан баран кыттан көрбүппүт. 1, 2, 3 миэстэ буолан кэлбиппит, эмиэ наһаа үөрбүтүм. Уонна Москваттан кэлэн иһэн Дьокуускайга эмиэ кыттыбыппыт онно 2 уонна 3 миэстэлэри ылбытым. Онтон Ньурбаҕа художественнай гимнастикаҕа бастакы курэхтэһии ыытыллыбыта, онно 2 миэстэ буолбутум. Иккитэ Ньурбаҕа ыытыллыбыт сборга сылдьыбытым. Художественнай гимнастикаҕа сылдьарбыттан астынабын, элбэх саҥаны сатаатым, элбэх саҥа дьүөгэлэрдэнним» — диэн Зоя кэпсээнин түмүктээтэ.
Зоя ийэтэ, Мария Демьяновна: «Мин санаабар Ньурбабыт улууһугар маннык спорт көрүҥэ баар буолбута олус үчүгэй. Художественнай гимнастика спорт саамай кырасыабай көрүҥэ буолар диэн сыаналыыбын. Мария Алексеевна маннык кружок арыйан эрэрин истээт да, тута кыргыттарбын суруттарбытым. Онон «Авокадо» арыллыаҕыттан сылдьаллар, оҕоҕо этэ-сиинэ сайдарыгар наһаа туһалаах. Оҕону эрдэ 3-4 сааһыттан биэрэр ордук дии саныыбын, этэ-сиинэ, уҥуохтара сымнаҕас, имигэс, истигэн эрдэхтэринэ. Улааттахтарына осанкаларыгар, атахтарыгар уопсай тас көрүҥнэригэр да, ис туруктарыгар да туһалаах буолуо этэ.
Билигин үс кыыһым үһүөн сылдьаллар, кырам 4 туолбута, 3 сааһыттан сылдьар. Улахаттарбын гимнастика Ньурбаҕа өссө эрдэ баар буолбута эбитэ буоллар, эмиэ отой кыраларыттан биэриэм этэ. Улахан кыыһым 2 юношеский разряд художественнай гимнастикаҕа толорбуттара»
Бу курдук саҥа саҕалааһынтан чаҕыйан турбакка, сөптөөх үлэ ыытан, үгүс ситиһии кэлэ турдаҕа. Бу көрүҥ республикабыт иһигэр Дьокуускай, Покровскай, Нерюнгри, Миирнэй куораттарыгар уонна бу биһиги Ньурбабыт улууһугар үлэлиир спорт көрүҥүнэн буолар.
Оҕолорбутугар үгүс элбэх ситиһиини, дьаныардаах дьарыгы, кыайыыны-хотууну баҕарабыт!
Динара Алексеева