Балаҕан ыйын 27 к. СӨ Судаарыстыбаннаһын күнүгэр нэһилиэкпитигэр үөрүүлээх күн үүннэ. Ньурбачаан нэһилиэгин туруу үлэһитэ Павел Афанасьевич Николаев аатын сүгэр киин уулуссабыт аспаалламмытын үөрүүлээх быһыыга-майгыга бэлиэтээтибит.
СӨ Тырааныспарын уонна суол хаһаайыстыбатын министиэристибэтин, «РИК «Автодор» тэрилтэни кытта улууспут пилотнай бырайыагын чэрчитинэн 1200 м усталаах уулусса аспаалланна.
Үөрүүлээх тэрээһин аалай лиэнтэтин Ньурба улууһун баһылыгын 1-кы солбуйааччыта В.Н.Семенов, РИК «Автодор» ААУо Ньурбатааҕы филиалыттан В.Н.Куприянов уонна Ньурбачаан нэһилиэгин баһылыга М.Н.Семенова быһа кырыйдылар. Мустубут ыалдьыттары, олохтоохтору, оҕолору алаадьынан, быырпаҕынан күндүлээтибит. Нэһилиэк баһылыгын Махтал суруктара туттарылыннылар, эҕэрдэ тыллары Семенов В.Н., Иванов Н.В. эттилэр.
Салгыы аспаалламмыт суол устун Сахабыт сирин былааҕын күөрэччи тутан мустубут дьон сахалыы таҥастаах сэлэлээн хаамтылар, оҕолор, ыччаттар бэлисипиэтинэн, ролигынан күлэ-үөрэ «Тумсуу» култуура киинин тэлгэһэтигэр атыы-эргиэн дьаарбаҥкатыгар тоҕуорустулар. Сайдыы – суол хорук тымыра диэн мээнэҕэ этиллибэт. Төрөөбүт дойдубут өссө да тупсуоҕа, киэркэйиэҕэ диэн эрэлбит улахан.
Ньурбачаан олохтоох дьаһалтата.