Нуучча дуобатыгар сахалартан маҥнайгы ССРС спордун маастара Семен Семенович Николаев аатынан республикатааҕы нуучча дуобатыгар Б категориялаах турнир үрдүк таһымҥа ыытылынна
Ахсынньы 12 күнүгэр Күндээдэ нэһилиэгэр ССРС спордун маастара Семен Семенович Николаев аатынан республикатааҕы нуучча дуобатыгар турнир кыайыылаахтарын наҕараадалааһын уонна анал бириистэри туттарыы ыытылынна.
Улуустааҕы спорт управление аатыттан анал бириистэри спорт управление сүрүн специалиһа Аким Канаев Прокопий Федотовка, Камилла Ивановаҕа, Мария Захароваҕа туттартаата. Улуустааҕы дуобат уонна саахымат федерациятын (салайааччы Мярикянов Э.Н.) аатыттан Иван Токусаров Григорий Кычкиҥҥа, Евгений Болтоковка туттарда. Маны тэҥэ, Семен Семенович Николаев дьиэ кэргэнин аатыттан 50 000 солк бирииһи Анатолий Степанов ылла. «Күндээдэ нэһилиэгэ» муниципальнай тэриллии аатыттан анал бириистэр туттарылыннылар.
Бу курдук, барыта 142 кыттааччылаах, Амма, Кэбээйи, Үөһээ Бүлүү, Сунтаар, Мииринэй уо.д.а улуустартан кыттааччылардаах, гроссмейстердар, Аан дойду, Европа, Арассыыйа чемпионнара кыттыылаах нуучча дуобатыгар турнир ыытылынна. Күрэх сүрүн судьуйатынан СӨ дуобакка сүүмэрдэммит хамаандатын үрдүкү тренерэ, гроссмейстер Иван Токусаров үлэлээтэ.
Күрэх үрдүк таһымҥа ыытылларыгар күүс-көмө буолбут Күндээдэ нэһилиэгин дьаһалтатыгар, баһылык Яков Замятиҥҥа, Күндээдэ орто оскуолатын дириэктэригэр Татьяна Васильеваҕа махталбытын тириэрдэбит.
Улуустааҕы дуобат уонна саахымат федерациятын хаһыс да сылын салайан үлэлэтэр Эдуард Мярикянов дьонун түмэ тардан Ньурбабыт улууһугар үгүс элбэх тэрээһиннэргэ оҕолортон саҕалаан аҕам саастаахтарыгар диэри өрүү күрэхтэргэ кытталлар.
Улуустааҕы спорт управление пресс-киинэ