Быйыл “Биһик” уһуйааммыт тэриллибитэ 60 сыллаах үбүлүөйэ.
Истиҥник саныыр өр сылларга бииргэ үлэлээбит бэтэрээннэрбин эҕэрдэлиибин! Эдэр үлэлии, айа-тута сылдьар кэллиэгэлэргэ элбэх кырачааннары сайыннаран ситиһиигит эбиллэ турдун диэн алгыс тылбын тиэрдэбин.
Мин, Федорова Валентина Дмитриевна, Ньурба сопхуос деткомбинатыгар 1972 с. үлэҕэ киирбитим. Ол саҕана совхоз дьыссаата буолан оҕолор төлөбүрэ суох босхо сылдьаллара, үлэ сарсыарда 8 чаастан киэһэ 8 чааска диэри. Аны өрөбүллэргэ сопхуос тэрилтэтэ буолан ыанньыксыттары солбуйуу, хотон сыбааһына, хаппыыста олордуу-хомуйуу барытыгар субуотунньуктаан иһэрбит.
Өрөспүүбүлүкэҕэ биллэр хорутуулаах үлэлээх «Биһик” дьыссаакка 43 сыл үлэлээбиппинэн киэн тутта саныыбын.
Бүгүн мин дьүөгэм, кэллиэгэм Татьяна Николаевна Афанасьева туһунан санаан ахтан ааһыахпын баҕардым. Татьяна Николаевналыын маҥнай эргэ корпуска кэккэлэһэ группаларга үлэлээн билсибиппит. Саха дьахтарыгар холку, оҕолордуун үлэлииригэр “саха сатаабата суох” диэн тыл киниэнэ. Олоҕу кытта тэҥҥэ саха оҕотун хайдах сайдыахтааҕын чопчу билэр, айылҕаҕа сырытыннаран эт-хаан сайдыытын күүскэ ирдиирэ.
1980 сылларга Ньурба сопхуос “Теремок” деткомбинатын Татьяна Николаевна салайара. Кини оҕо саадын материальнай базатын бөҕөргөппүтүнэн барбыта. Корпустарга туспа оҕо утуйар хосторо оҥоһуллан, сырыы аайы утуйар таҥас, раскладушка таһыыта тохтоон ньээнньэ үлэтэ биллэ чэпчээбитэ. Татьяна Николаевна элбэхтик төрөппүтү көмөлөһүннэрэрэ, сотору-сотору субуотунньуктары тэрийэн мас бэлэмнэтэн, дьыссаат тула олбуор саҥардыллыбыта. Оҕо площадкатыгар оҕо оонньуур араас сыырдара, хачыал-сөмөлүөт, остуоруйа кыылларын төрөппүттэр маһынан кыһан киэргэтэн оҕолору үөрдүбүттэрэ.
Татьяна Николаевна дьону кытары астыктык-аһаҕастык кэпсэтэн, дьону түмэр ураты дьоҕурдааҕа. Сопхуос дириэктэрэ Павлов Алексей Андреевиһы кытта сүбэлэһэн үп-харчы тыырыллан кухняҕа саҥа тэрил бөҕө кэлбитэ: жаропарочнай ыскаап, үүт оргутар, улахан производственнай мясорубка. Группаларга саҥа миэбэл, үлэлииргэ-хамныырга табыгастаах усулуобуйа оҥоһуллубута.
Оҕону иитиигэ Татьяна Николаевна сүрүн болҕомтотун үлэ эйгэтигэр туһаайбыта. Оҕону үлэннэн иитиигэ материальнай базатын тэрийэргэ столяркаҕа сакаастаан уһанарга дьүөрэ станоктары, оҕо эрбиитин, өтүйэтин оҥотторбута. Оскуома бэриллэн оҕо үөрүүннэн саайа, эрбии үөрэнэрэ. Онтон саас сиэмэ олордорго оҕолор көмөлөһөллөрө.
Татьяна Николаевна саҕана оҕону интернациональнай уонна патриотическай иитиигэ улахан болҕомто ууруллара. Онно иитээччи уонна төрөппүт биир санааннан үлэлээн элбэх тэрээһиннэри ыыталлара, оҕолор, төрөппүттэр даҕаны көхтөөхтүк кытталлара. Омук оонньуута, аһылыга, остуоруйата, таҥаһа-саба, оһуора оҕону, улахан да киһини умсугутара. ССРС республикаларын омук таҥастаах куукулалара оҥоһуллубуттара, оҕо болҕомтотун күүскэ тарпыта.
Татьяна Николаевна методист Тамара Леонидовналыын биир сүбэннэн өйдөһөн, үлэлээн саҥаны-сонуну иилэ хабан ылар буолан үлэҕэ аныгылыы сыһыаннаахтара. Аныгы кэм этиитинэн оҕону сахалыы тыыҥҥа иитиигэ хас биирдии иитээччи айымньылаахтык үлэлиирин ситиспиттэрэ. Иитээччилэр педагогическэй ааҕыыларга, көрүү күрэхтэргэ инники күөҥҥэ сылдьаллара. Идэтийии таһымыгар уһулуччу үрдүк категориялаах иитээччи элбээбитэ. Кинилэр регион, өрөспүүбүлүкэ таһымыгар тахсан уопуттарын тарҕаппыттара.
Октябрьскай нэһилиэккэ үтүө үгэс баар — үөрэххэ, спорка, общественнай үлэҕэ ситиһиилэммит оҕолорго, улахан дьоҥҥо Анал бириэмийэлэр туттарыллаллар. Педагогическай үлэ бэтэрээнэ Татьяна Николаевна Афанасьева оҕолоро бу үгэһи өйөөн ийэлэрин аатынан «Премия за успехи в воспитании детей дошкольного возраста” сыл аайы туттараллар.
В.Д. Фёдорова,
Саха өрөспүүбүлүкэтин үөрэҕириитин туйгуна, бочуоттаах бэтэрээнэ