Хаҥалас орто оскуолатыгар сэтинньи 29 күнүгэр «Школьный Агростартап» оройуоннааҕы агрошколаларга аналлаах тэрээһин буолан ааста. Сүлэ, Маалыкай Хаҥалас уонна Антоновка оскуолаларыттан 6 бырайыагы экспердар көрдүлэр, сыаналаатылар. 
Бу куонкурус бэйэтэ эмиэ бырайыак быһыытынан 2024 сыллааҕы Ньурба оройуонун баһылыгын куонкуруһугар кыайан грант ылбыта.. » Школьный Агростартап » бырайыак сүрүн сыала оҕолору тыа хаһаайыстыбатыгар сыһыарыы, тыа сирин үлэтигэр үөрэтии буолар. Проект бу тэрээһинин сүрүн соругунан оҕо бэйэтин бизнес идеятын олоххо киллэрэрин өйөөһүн, сыл устата ону кэтээн көрүү, чахчы үлэлииригэр, кэҥииригэр көмө оҥоруу буолар.
Бу ыытыллыбыт тэрээһин түмүгүнэн:
Хаҥалас орто оскуолатын перепёлка иитии туһунан бырайыага – 1 миэстэ буолан бэйэ дьыалатын арынарыгар 15 000 солк.көмө харчы ылары ситистэ;
Антоновка оскуолатын мыыла оҥорор бырайыага – 2 миэстэ буолан 10 000 солк көмө харчы;
Маалыкай оҕолорун рассада үүннэрэн атыылааһын туһунан бырайыага – 3 миэстэ буолан 5 000 солк. бэйэ дьыалатын арыналларыгар көмө харчыны ыллылар.
Оҕолор үлэлэрин экспердар:«Россельхозбанк» Ньурбатааҕы салаатын салайааччыта Башарина Сардана Лазаревна,
үөрэҕирии салалтатыттан Васильев Сергей Викторович,
тыа хаһаайыстыбатын департаменын специалиһа Осипов Алексей Петрович сыаналаатылар.
Кинилэр хас биирдии бырайыагы болҕойон истэн, сүбэ-ама биэрэн оҕолору уонна салайааччылары үөртүлэр. Инникитин өссө сайдан, бырайыактарын сайыннаран олоххо киллэрэллэригэр баҕа санааларын эттилэр. 
Сардана Лазаревна «Россельхозбанк» аатыттан оҕолорго уонна Хаҥалас оскуолатыгар агро үөрэхтээһиҥҥэ олус туһалаах кинигэлэри бэлэх туттарда.
Хаҥалас орто оскуолата » Школьный Агростартап » проект чэрчитинэн өссө даҕаны
Ньурба агро хайысхалаах оскуолаларыгар аналлаах тэрээһиннэри ыытар былааннаах, оҕолор бизнес-проектара олоххо киирэрин кэтээн көрүө.
« Ыллык » эдкорпост, Хаҥалас