🏓Бэҕэһээ Ньурба Хаҥалаһыгар остуол тенниһин таптааччыларыгар үөрүүлээх күн үүннэ – теннис энтузиаһа Иванов Василий Тимофеевич аатынан остуол тенниһигэр региональнай күрэхтэһии буолан ааста.
Түөрт Бүлүү улуустарыттан улаханыттан оҕотугар диэри 130-тан тахса кыттааччы кэлэн киэһэ хойукка диэри күрэхтэһиилэр буоллулар. Өр кэмҥэ күрэхтэспэккэ, көрсүбэккэ сылдьыбыт дьон өрө көтөҕүллэн, үөрэ-көтө ракетка тутан ойо-тэбэ оонньоотулар.
🏓Ньурба оройуонун теннис федерациятын салайааччыта Дондокова Самангади Базарсадаевна ыҥырыытынан өрөспүүбүлүкэ тенниһин федерациятын президена Максимов Петр Федорович кэлэн күрэхтэһиини көрдө-иһиттэ.
🏓Дьокуускайтан, Ньурбаттан, Бүлүүттэн Василий Тимофеевич кэргэнэ, кыыһа, доҕотторо, бииргэ теннискэ оонньоон элбэхтэ алтыспыт дьоннор өрөспүүбүлүкэ хас да төгүллээх чөмпүйүөннэрэ: Васильев Марк Афанасьевич, Самсонов Василий Прокопьевич уонна да атын ааттаах-суоллаах спортсменнар, теннис ветераннара кэлэн кытыннылар. Остуол тенниһин сайдыытын тула аһаҕас кэпсэтии буолла. Манна дьон бэйэтин санаатын этиннэ, туох ыарахаттары, кыһалҕалары хайдах быһаарылларын кэпсэтистилэр. Инникитин бу этиллибит этиилэр, баҕа санаалар туолуохтара диэн эрэл баар.
Күрэхтэһии призовой фондата баай буолан, кыттааччы үксэ илии тутуурдаах, өттүк хараалаах бардылар. Бу маннык тэрээһиннэр көхтөөхтүк бараллар диэн бэлиэтиэххэ наада.
🏓Биһиги хаҥаластар киэн туттар киһибит Иванов Василий Тимофеевич аатынан күрэхтэһии этэҥҥэ, олус сэргэхтик ааспытыттан үөрдүбүт. Күрэхтэһиини Хаҥалас нэһилиэгин дьаһалтатын, кулуубун, оскуолатын үлэһиттэрэ ыыттылар. Ньурба оройуонун остуол тенниһын салайааччыта Дондокова Самангади Базарсадаевна салайан, сүбэлээн биэрдэ.
Оройуон салалтатыттан, оҕо спортивнай оскуолата, үөрэҕирии салаата суолталаан, кэлэн көрөн-истэн бардылар.
🏓Эдэр теннис энтузиастара Федорова Алена Ивановна, ыаллар Константин Валерия Владимировтар, Борислав Туйаара Алексеевтарга туспа махтал тылларын этэбит! Ньурбаҕа теннис сайдыа, инникитин өссө тупсан иһиэ!
Наталья Жданова