Төрөөбүт дойдуга бэриниилээх буолуу бу киһиэхэ кыра сааһыттан иҥтэҕинэ суолталааҕын бэлиэтээн уһуйаан, оскуола саастарыттан үөрэх бырагыраамаларыгар киллэрэн үөрэтии, тэрээһиннэр ыытыллаллар.
Бу манна эт-хаан өттүнэн саайдыылаах буолан тахсалларыгар, маны сэргэ спордунан дьарыктанар оҕо икки бүк патриот буолан тахсыытыгар үлэлэһэр сыаллаах «Уроки мужества», «Разговоры о важном» уруоктары ыытыыга үлэлэһэн, маны сэргэ нэдиэлэ саҕаланыыта линейка быһыытынан дойду былааҕын көтөҕөн, хас биирдии оҕо дойду гимнын билиэхтээҕин ирдиибит. Онтон спортсмен киһи дойдутун ааттатан спорка ситиһиитэ бу эмиэ кини төрөөбүт дойдутугар кылаата буолар.
Итинтэн сиэттэрэн спордунан патриот дьону иитэн таһаарыы диэн сыаллаах туох үлэ ыытылларын Ньурба оройуонун физическэй култуура уонна спорт управлениетын салайааччыта Роберт Александрович Алексеевтыын уонна Ньурбатааҕы оҕо спортивнай оскуола тэрийээччи педагога Альберт Михайлович Неустроевтыын сэһэргэстибит.
«Кэлиҥҥи сылларга дойдубут үрдүнэн араас уларыйыылар киирэннэр, дойдуга бэриниилээх буолуу, патриот дьону иитэн-такайан таһаарыыга үлэ өссө сытыырхайан туран ыытыллар буолла. Оҕо көлүөнэнэн, сааһынан дойдуга бэриниилээх буолуута эмиэ суолталаах дии саныыбын. Билигин оскуолаларга программаларга эбии уларыйыы киирэн уруоктар ыытыллалар, саастарынан наардаан эт-хаан өттүнэн сайдыылаах буолууга ГТО нуорматын толоруу ыытыллар. Биһиги бу спорт эйгэтигэр Ньурбатааҕы оҕо спортивнай оскуолатын иитиллээччилэригэр туһаайан эт-хаан эрчиллиитин сэргэ, патриотическай иитиигэ болҕомто ууран, анал дьарыктар ыытыллыахтара. Сайын оҕолорбутугар спортивнай– патриотическай лааҕыр тэрийэн үлэлэтэр былааннаахпыт. Маны таһынан региональнай таһымнаах спортивнай-патриотическай тиэмэлээн күрэх тэрийиигэ кэпсэтэ сылдьабыт. Бу үлэни иилээн-саҕалаан Ньурбатааҕы оҕо спортивнай оскуола тэрийээччи педагога Альберт Михайлович Неустроев үлэлэһэр», — диэн Роберт Александрович иһитиннэрдэ.
Альберт Неустроев: «Билигин үгүстүк истэбит оҕо патриот, дойдуга бэриниилээх буолуохтаах диэн. Онтон патриот диэн кимий? Кини хайдах буолуохтааҕый? — диэҥҥэ оҕо да, улахан да киһи кырдьык мунаахсыйабыт. Быһаччы, саба тутан дойдутун таптыыр, дойдутун туһугар бэриниилээх киһини ааттыыбыт.
Ол гынан баран, бу дойдуну таптааһын, сүгүрүйүү, убаастабыл төрүөтэ дойдуҥ дириҥ ис хоһоонноох историятын, биһиги өбүгэлэрбит араас кэмҥэ оҥорбут дьайыылара, урут да билигин да уоттаах сэриигэ уонна тыылга геройдуу оҥорбут быһыылара, норуот, дойду култуурата, уус-уран номоҕо кэпсэнэр кэрчиктэр. Бу маны барытын ытыктыыр, билэр киһиэхэ төрүөт үөскүөхтээх дойдутугар сугүрүйэргэ, атын суол суох. Оннук сыаллаах биһиги спордунан дьарыктанар оҕолорго патриотическэй иитиини олохтуурга бу бырайыак оҥорон үлэлэтэн эрэбит .
Тус бэйэм, ыччаты кытары үлэлиир кэммэр, оскуолаҕа «Мохсоҕол» диэн патриотическэй кулууптаах этим. Бэйэтэ программалаах, календарнай былааннаах. Күрэхтэри быһа эфирга көрдөрүүгэ, видеороликтары, бэчээтинэй бородууксуйалары оҥорорго Семен Альбертович Васильевтыын үлэлэһэбит. Социальнай ситим нөҥүө патриотика тиэмэтигэр туһуламмыт үлэлэри оҥорон, оҕолорго үөрэтии быһыытынан, матырыйааллары туттан үлэлэтэр былааннаахпыт», — диэн санаатын үллэһиннэ.
Бу курдук оҕоҕо төрөөбүт дойдуга тапталы иҥэрии, бэриниилээх буолуу боппуруоһа сытыырхайан турар кэмигэр сөптөөх үлэ ыытыллан, сааһынан сөп түбэһиннэрэн иитэн-такайан таһаарыы суолталааҕын бэлиэтиибит.
Ньурбатааҕы спорт управление пресс-киинэ