Кулун тутар 11 күнүттэн Ньурба тыйаатырын сценатыгар саха норуотун көрөөччүлэрэ тумус туттар, аар- саарга аатырбыт Саха академическай тыйаатырын 100 сыллаах үбүлүөйүгэр анаммыт сааскы гостуруола саҕаланна.
46 киһилээх Саха тыйаатырын гостуруоллуур бөлөҕө Үөһээ Бүлүүттэн саҕалаан, Ленскэй, Мирнэй, Сунтаар улуустарыгар сылдьан Ньурбаҕа үс күн көрөөччү биһирэбилин ылбыт бастыҥ туруорууларын көрдөрөр.
Оҕолорго күнүс Николай Якутскай «Ойуур оскуолата» остуоруйатын, киэһэ Борис Васильев аатырбыт «А зори здесь тихие…» сэһэнинэн Роман Дорофеев туруорбут «Сарсыарда. Уу-чуумпуга…» сэрии драматын оонньоотулар.
Кулун тутар 12 күнүгэр көрөөччүлэргэ анаан И.Гоголев-Кындыл “Хара кыталык” драматын, оттон бүгүн У.Захаров сценарийынан “Коркин. «Андаҕар» испэктээгин көрөөччүлэр көрүөхтэрэ.
Саха театрын гостуруолун Ньурба тыйаатырын дириэктэрэ, СӨ үтүөлээх артыыһа Николай Никитин арыйбыта. Саха тыйаатырын сүрүн режиссера Руслан Тараховскай гостуруолга сылдьар артыыстары билиһиннэрдэ. Кинилэр ортолоругар бааллар: СӨ норуодунай артыыската, Ньурба тыйаатырын төрүттээччи Багынанова Зоя Петровна, Арассыыйа үтүөлээх, СӨ норуодунай артыыската Николаева Изабелла Васильевна, СӨ норуодунай артыыскалара Сергеева-Румянцева Лена Диасовна, Уйгурова Домна Васильевна, СӨ үтүөлээх артыыскалара Борисова Маргарита Михайловна, Потапова Елизавета Федотовна, Ньурба Маарыттан төрүттээх СӨ култууратын туйгуна Лена Дмитриевна Маркова.
Фото-М.Семенова
Мария Семенова