Ньурба оройуонун Киирэп нэһилиэгин олохтооҕо Денис Аркадьевич Иванов 2022 сыл, кулун тутарыгар улуустааҕы социальнай харалтаны кытары социальнай хантараак түһэрсэн, бэйэ дьыалатын тэринэн, «Бүргэс» атах таҥаһын тигэр кыра сыах астан үлэтин саҕалаабыта. Быйыл үлэлээбитэ иккис сылыгар барда.
Денис Аркадьевич итальянскай технологиянан атах таҥаһын тигэрин туһунан соторутааҕыта ватсап ситимигэр тарҕаммыта.
Кини бастаан бэйэ дьыалатын астан үлэлиирин саҕана хаһыакка суруйбут буоламмын, Денис Ивановтан кэккэ боппуруостарга эппиэттииригэр көрдөстүм.
-Денис Аркадьевич, үлэҥ-хамнаһын туһунан ааҕааччыларга билиһиннэр эрэ.
-Сакаасчыт мэлдьи баар буолар, клиеннэр сакаастарыттан астыналлар. Онтон ордук үлэһит киһиэхэ туох наада буолуой. Үлэ элбэҕинэн бириэмэ тиийбэт. Матырыйаал сыаната күн-түүн үрдүү турарыттан киһи хараастар.
🥾👞👢-Итальянскай технологиянан тигиигэ ханна үөрэммиккиний?
-Бэйэ дьыалатынан дьарыктанааччылары Ньурба улууһун дьаһалтата өйөөн, ааспыт сайын Москубаҕа үөрэттэрэ ыыппыта. А.Н.Косыгин аатынан университекка дизайн технологиятыгар үөрэммитим.
Бу сыл олунньу ыйыгар улуус дьаһалтата анал тэрил (иистэнэр массыына) ылынарбар өйөбүл оҥордо.
-Клиеннэр ордук хайдах атах таҥаһын сакаастыылларый?
-Билигин кыһын буолан, ордук унтуулары улларабын. Түгэнинэн туһанан улуус дьаһалтатыгар урбаан, эргиэн уонна олохтоох оҥорон таһаарыы департаменыгар махталбын тиэрдэбин.
Антонина Семенова