Сэтинньи 3 күнүгэр «Саха саҥата» түмсүү уонна П.С. Егоров аатынан Акана орто оскуолатын администрацията көҕүлээһининэн “Сэргэх кэпсэтии” төрөппүттэргэ аналлаах уопасай мунньах буолан ааста. Мунньахха кыттыыны ыллылар «Саха саҥата» түмсүү чилиэннэрэ Торохова Е.А., Соркомова А.П., 18 төрөппүт.
Мунньах 1 түһүмэҕэр Саха Өрөспүүбүлүкэтин норуот эмчиттэрин ассоциациятын чилиэнэ, үрдүкү категориялаах норуот эмчитэ, норуоттар икки ардыларынааҕы ЮНЕСКО иһинэн норуоттар медициналарын Магистра, Таркаайы нэһилиэгин бочуоттаах олохтооҕо, үлэ бэтэрээнэ, «Аар Айыы» итэҕэлин алгысчыта Иннокентьева А.М. алгыс түһэрдэ, төрөппүттэргэ сиэр-туом, итэҕэл туһунан лиэксийэ аахта, ыйытыыларга эппиэттээтэ.
Иккис түһүмэххэ саха тылын учуутала Васильева Н.В. «Төрөөбүт тыл дьылҕата – төрөппүт илиитигэр» диэн тиэмэҕэ иһитиннэрии оҥордо. Оҕону төрөөбүт тылынан иитиигэ, саҥардыыга куйаар ситимин матырыйаалларын хайдах туһаныахха сөбүн кэпсээтэ.
Үһүс түһүмэххэ оскуола дириэктэрэ Мигалкина Е.Ф. оскуола 1 чиэппэр түмүгүнэн үлэтин-хамнаһын, ситиһиилэрин билиһиннэрдэ. Дириэктэри иитэр үлэҕэ солбуйааччы Никонова М.У. төрөппүт уонна оҕо икки ардыгар сыһыан туһунан диспут ыытта. Араас ситуацияларга төрөппүттэр бэйэлэрин санааларын эттилэр, ол тула интэриэһинэй ырытыы, кэпсэтии таҕыста. Төрөппүттэр оҕо иитиитигэр ханнык тиэмэлэри ордук интэриэһиргииллэрин, билиэхтэрин баҕаралларын туһунан аҥкыата толордулар.»Сэргэх кэпсэтии» сонуннук, туһалаахтык ааста
Наталья Васильева, «Саха саҥата» түмсүү салайааччыта, П.С. Егоров аатынан Акана орто оскуолатын саха тылын учуутала.