Улууспут баһылыга Алексей Иннокентьев, Ньурба куорат баһылыга Геннадий Игнатьев, Дьаархан нэһилиэгин баһылыга Станислав Конощук, «Ньурба-Агро МТС» дириэктэрэ Семен Николаев уонна Москваҕа олорор биир дойдулаахпыт Алексей Николаев СВО зонатыгар тиийэн, Анал байыаннай эпэрээссийэҕэ кытта сылдьар биир дойдулаахтарбытын көрсөн кэллилэр. Улуус тэрилтэлэрэ кыттыспыт үптэрин суотугар матассыыкыллары, ону таһынан буойуттарга тус аадырыстаммыт посылкалары, маскировочнай хаххалары, түүн хараҥаҕа көрөр прибордары, рациялары, дронтан сэрэтэр прибордары, тепловизордары, олохтоох астары, Ньурба ууһа оҥорбут саха быһахтарын, оҕолорбут суруктарын уо.д.а. туттардылар. Кыайан көрсүбэтэх уолаттарыгар илдьибит гуманитарнай посылкаларын, байыаннай оборудованиелары, тус аадырыстаммыт посылкалары барытын кинилэргэ тиэрдэллэригэр диэн тирэх пууннарга уонна хамандыырдарга хааллардылар. Буойуттарбыт дойдуларыттан кэһии, көмө тутан, сонун истэн улаханнык сэргэхсийдилэр, сүргэлэрэ көтөҕүлүннэ. Кинилэр санаалара бөҕөх, кыайыыга эрэллээхтэр. Уолаттарбыт улуус дьонугар-сэргэтигэр истиҥ махталларын тиэрдэргэ көрдөстүлэр.
Улуус баһылыга Алексей Иннокентьев салайааччылаах бөлөх байыастарга этэҥҥэ сылдьан кыайыы көтөллөөх дойдуларыгар төннөллөрүгэр баҕаран алгыһын аныыр. «Улуустааҕы СВО фондатыгар харчынан кыттыспыт Ньурбабыт урбаанньыттарыгар, тэрилтэлэр коллективтарыгар, эбэлэрбит волонтерскай сыахтарыгар уонна бары көмөлөспүт дьоммутугар, улууска уонна атын сиргэ олорор биир дойдулаахтарбытыгар дойдубутун көмүскүү сылдьар уолаттарбыт ааттарыттан, улуус дьаһалтатын уонна тус бэйэм ааппыттан улахан махталбын тиэрдэбин, — диир Алексей Михайлович. – Тэрээһиннээх хаһаайыстыбалар, тэрилтэлэр уонна урбаанньыттар СВО фондатыгар кыттыһан улахан көмөнү оҥордулар. Чуолаан Кировтааҕы чох разреһа, Көтөр фабриката, «Ньурба-Агро МТС», «Күндээдэ» АО, «Ньурбатааҕы кормовой хампаанньа» харчынан көмөлөһөн матассыыкыллары ылан тиэртибит. Дьокуускайтан чааһынай тэрилтэлээх урбааннньыттар: Николай Александрович Санников 100-тэн тахса тыһ. солк. суумаҕа эминэн-томунан уонна индивидуальнай аптечкаларынан, жгуттарынан, пледынан, утеплителинэн уо.д.а., Айкар Романович Кондратьев 100-тэн тахса тыһ. солк. суумалаах рацияларынан көмөлөстүлэр. Бырысыап ыларга көмөлөспүт Маартан төрүттээх Федор Дмитриевич Яковлевка, кинилэр бииргэ төрөөбүттэригэр, бырааттарыгар, «Сэттэ» хампаанньаҕа, итиэннэ атын даҕаны элбэххэ көмөлөспүт дьоммутугар барыларыгар улуус салалтатын аатыттан барҕа махталбын тиэрдэбин! Эһиги көмөҕут уолаттарбыт этэҥҥэ сылдьан, кыайыылаах-хотуулаах эргийэн кэлэллэригэр күүс-көмө буолар».
Бу туһунан Алексей Иннокентьев Телеграмм-каналыгар суруйда.
«Ньурба» хаһыат.