Сыл бүтэһигэр мэлдьи буоларын курдук, бүгүн Ньурба к. «Кыталык» култуура дыбарыаһыгар улуус баһылыга Алексей Иннокентьев сыл түмүктэрин уонна кэлэр сыллааҕы үлэ сүрүн хайысхаларын туһунан улуус бэрэстэбиитэллээх уорганнарын депутаттарыгар, муниципальнай тэриллиилэр баһылыктарыгар уонна улуус олохтоохторугар туһуламмыт этиитин оҥордо.
Тэрээһин кыттыылаахтарын ортолоругар СВО кыттыылаахтара уонна байыаннай дьайыылар бэтэрээннэрэ бааллара дьон сүргэтин көтөхтө. Улуус баһылыга элбэх киһиэхэ наҕараадаларын туттарда. Ол иһигэр сыл түмүгүнэн норуот хаһаайыстыбатын араас салааларынан улуус бочуоттаах үлэһиттэрэ буолбут бастыҥ дьоммут, Кыайыыны чугаһатыһан дьаныардаахтык үлэлии сылдьар «КөмүсКэл» волонтерскай сыах чилиэннэрэ, СВО фондатыгар улахан кылааттарын киллэрбит тэрилтэлэр салайааччылара, урбаанньыттар уо.д.а. бааллар. Барыларын кэлэр иһэр саргылаах Саҥа дьылынан истиҥник эҕэрдэлиибин уонна чэгиэн-чэбдик доруобуйаны, дьолу-соргуну, табыллыыны баҕарабын!
Бу туһунан улуус баһылыга Алексей Иннокентьев бэйэтин Телеграм-каналыгар суруйда.
«Ньурба» хаһыат