Сылын аайы ыытыллар «Сыл Учуутала» Бүтүн Арассыыйатааҕы Идэ куонкуруһун өрөспүүбүлүкэтээҕи түһүмэҕэ бу ааһан эрэр 2024 сыл түмүгүн таһаарар тыҥааһыннаах күннэрэ Дьокуускай куоракка буолан аастылар.
Бу куонкурус үөрэҕирии эйгэтигэр олус суолталаах уонна учуутал идэтин престиһын үрдэтэр сыаллаах буолар. Бастыҥ учууталы талыы эрэ буолбакка, педагогтар үлэлэрин, идэлэрин суолтатын көрдөрөр, кинилэр уопуттарын атастаһан таһымнарын үрдэтэллэригэр төһүү күүс буолар уонна кыах биэрэр. Быйылгы күрэхтэһиигэ таһымнаах, талааннаах 35 учууталлар өрөспүүблүкэ араас муннуктарыттан муһуннулар. Манна биология, химия, математика, история, обществознание, английскай, нуучча, саха тылларын, алын сүһүөх, ОБЗР учууталлара бааллар. Кинилэр бары элбэх сыра-сылба ууран, бэлэмнэнэн кыттыыны ыла кэлбиттэр.
Күрэхтэһии 2 түһүмэххэ араарыллан 4 күн ыытылынна. Барыта холбоон 5 көрүҥҥэ учууталлар бэйэлэрин холоннулар. Ол курдук – уруок, маастар-кылаас, пед.интервью, брифинг уонна блиц-турнир. Манна экспердар кыттааччылар уруогу ыытыыларын эрэ буолбакка кинилэр араас өттүнэн төһө сайдыылаахтарын, билиилэрин-көрүүлэрин таһыма үрдүгүн, ыксаллаах, наадалаах кэмҥэ төһө түргэнник бэйэлэрин көрдөрөллөрүн бэрэбиэркэлээн, кэтээн көрдүлэр. Ону таһынан учууталлар оҕону иитии, уопсайынан педагогическай эйгэҕэ төһө эрэллээхтик сылдьалларын, быһаарсалларын билиһиннэрдилэр.
Биһиги Ньурбабыт аатын быйылгы оройуоннааҕы түһүмэх кыайыылааҕа, Хаҥалас орто оскуолатын английскай тылын учуутала Иванова Александра Аркадьевна көмүскээтэ. Кини 13 сыл педагогическай ыстаастаах саамай үлэлиир үгэнигэр сылдьар эдэр учуутал. Хайдах үөрэҕи бүтэриэҕиттэн английскай тылы оҕолорго үөрэтэр. Мииринэй курдук сайдыылаах сиргэ үлэлээн, Киирэп курдук кыра оскуолаҕа хатарыллан учууталлаан кэлбитэ. Кини үөрэх өттүгэр дириэктэри солбуйааччы быһыытынан, профсоюзнай кэмитиэт салайааччытынан үлэлээбит уопуттаах.
Александра Аркадьевна аҕыйах сыллааҕыта Хаҥаласка көһөн кэлэн эмиэ учууталынан уонна оҕо тэрилтэтин салайааччытынан ситиһиилээхтик үлэлии сылдьар. Бу ааспыт куонкуруска бэйэтин Ньурбатын улууһун чиэстээхтик көмүскээтэ. Ол курдук куорат оскуолатын 6 кылааһын оҕолоругар уруок ыытта. Дьүүллүүр сүбэ иннигэр аһаҕастык педагог быһыытынан бэйэтин көрүүлэрин, санааларын билиһиннэрдэ, ыйытыыларга хоруйдаата. Александра Аркадьевна этэринэн кини бу маннык таһымнаах күрэхтэһиигэ кыттыыта киниэхэ элбэҕи биэрдэ, инникитин үлэлииргэ күүс-уох эптэ диир. Бу маннык уопут хас биирдии учууталга наада, кини бэйэтин идэтин таптыырыгар, сыаналыырыгар уонна өссө өрө көтөҕүллэн үлэлииригэр олус наадалаах диэн санаатын эттэ.
Бу куонкуруһу ИРОиПК — учууталлар идэлэрин таһымын үрдэтэр үнүстүтүүт сылын аайы ыытар. Быйылгы түмүккэ Үөрэх уонна Билим Министиэристибэтиттэн миниистири солбуйааччы Михаил Присяжнай күрэхтэһээччилэри кэлэн биһирээтэ, хайҕабыл тылларын эттэ, спонсордар уонна үөрэх тэрилтэлэрин салайааччылара бэлэх, наҕараада туттардылар.
Муҥутуур кыайыылааҕынан алмаастаах Алдантан Дарья Мельник диэн көхтөөх, билиилээх, үтүө-майгылаах эдэр история учуутала ааттанна. Кини биһиги өрөспүүбүлүкэбитин дойду таһымыгар эрэллээхтик билиһиннэриэ диэн саарбаҕалаабаппыт. Киниэхэ үрдүк ситиһиилэри баҕарабыт!
Ньурба оройуонун учууталлара бу таһымнаах күрэхтэһиигэ сылын аайы кыттыыны ылаллар. Муҥутуур кыайыылаах аатын Ушканов Федор Федорович, лауреат үрдүкү аатын Кучуров Николай Егорович ылбыттара. Ол кэннэ онтон үрдүкү таһымҥа учууталларбыт тахса иликтэр.
Бу көрдөрүү толкуйдатар. Биһиги педагогтарбыт таһымнара хаалсыбат, ол эрэн манна кыттарга күүстээх көмө-өйөбүл, сүбэ-ама наада. Эрдэттэн хамыыһыйалар тэриллэн, методическай холбоһуктар хамсаныылара олус наада буолар эбит. Биһиги да сырыыбытыгар маннык дьаһаллар бааллар этэ, ол эрэн сыл бүтэһигэр араас тэрээһиннэр, олимпиадалар, куонкурустар мэһэй таһааран күүстээх дьаһаныы, бэлэмнэнии суох буолла. Онон бу маннык буолбатын туһуттан олус эрдэттэн тэринэн бэлэмнэнии ирдэнэр.
Бу үрдүк куонкуруска Иванова Александра Аркадьевна кыттыыны ыларыгар көмө-өйөбүл буолбут үөрэх салалтатыттан Андреева Анна Владимировнаҕа, Хаҥалас орто оскуолатын үөрэх чааһыгар дириэктэри солбуйааччытыгар, учууталларыгар барҕа махталбытын тиэрдэбит.
“Ыллык” пост, Хаҥалас