Итинник ааттаах кинигэни Саргылана Павловна Степанова эдьиийигэр Вера Павловна Иванова 70 сааһыгар анаан, тапталын биллэрэн, ылсыбыт дьыалатын тиһэҕэр тириэрдэн, дьоҕус альбомнай кинигэни Дьокуускай куоракка «Офсет» кинигэ кыһатыгар бэчээттэтэн таһааттарда.
Балаҕан ыйын ааспыт чэппиэригэр «Сырдык санаалаах үтүө киһибит тула» кинигэ билсиһиннэриитэ буолла. Киин бибилэтиэкэ үлэһитэ Маргарита Ноева кинигэ сүрэхтэниитин иилээн ыытта. Презентацияҕа Вера Павловна кыргыттара, балтылара, чугас аймахтара уонна кинигэҕэ киирбит ыстатыйалар ааптардара кыттыыны ыллылар.
«Сырдык санаалаах үтүө киһибит тула…» кинигэҕэ Вера Павловна чугас аймахтара, доҕотторо, култуура тэрилтэтигэр алтыспыт дьоно-сэргэтэ, дьүөгэлэрэ ахтыыларын таһынан, араас кэмтэн, түгэннэртэн хаартыскалар киирбиттэрин, кинигэ дьоруойа олорон ааспыт олоҕо арылхайдык көстөрүн туһунан Маргарита Романовна билиһиннэрдэ.
— Кинигэ бастакы сирэйигэр Вера Павловна «Милая мама» сөбүлээн ыллыыр ырыата, ыллыы турар хаартыската киллэриллибитэ ааҕааччыга Вера Павловна ыллыы турарын санатар,- диэн Маргарита Ноева эттэ.
СӨ үөрэҕириитин туйгуна, нуучча тылын, литературатын учуутала, Дьаархан нэһилиэгин бочуоттаах олохтооҕо Тамара Иннокентьевна Федорова, үлэ бэтэрээнэ Римма Тимофеевна Григорьева, Вера Павловна балтыларын кытары алтыһан улааппыт ыаллара СӨ үөрэҕириитин туйгуна, Арассыыйа уопсай үөрэхтээһинин бочуоттаах үлэһитэ Анастасия Дмитриевна Донская, ыала, доруобуйа харыстабылын үлэһитэ Антонина Васильевна Ксенофонтова ахтыы киэһэтигэр ахтан-санаан аастылар.
Кинигэ ааптара Вера Павловна кыра балта Саргылана Павловна: «Эдьиийим Вера Александра Егоровна Иванова, Павел Матвеевич Кононов дьиэ кэргэннэригэр 1953 сыллаахха, балаҕан ыйын 28 күнүгэр бастакы оҕонон күн сирин көрбүтэ.
Эдьиийим Биэрэ кыра сылдьан атаҕа ыалдьан куоракка санаторийга сытан онно үөрэммитэ. 8-с кылааһы бүтэрэн баран Дьаархаҥҥа кэлбитэ. Ийэбит эрдэ өлбүтэ. Биһиги аҕабытын уонна эбээбитин кытта олорбуппут. Эдьиийим Биэрэ отой нууччалыы саҥарар буолан кэлбитэ.
Эдьиийим эдэр сааһыттан ыарахан үлэттэн чаҕыйбакка, күүһэ-кыаҕа баарынан үлэлээбитэ. Өр сылларга култуура эйгэтигэр, кэлин олоҕун тиһэх күнүгэр диэри инбэлииттэр уопсастыбаларыгар булҕаалтырдаабыта».
Салгыы Саргылана Павловна төрөппүттэрэ эрдэ суох буолбуттарыгар эдьиийдэрэ Вера атын оҕолортон итэҕэһэ суох иитэн-такайан улаатыннартаан, үлэһит оҥортообутун туһунан махталын биллэрэн ахтан ааста.
Кинигэҕэ Вера Павловна кыргыттара Александра, Ньургустаана олус истиҥ, иһирэх ахтыылара ааҕааччыны долгутар.
Арассыыйа култууратын үтүөлээх үлэһитэ, СӨ култууратын бочуоттаах үлэһитэ, култуура үлэһиттэрин Идэлээх сойуустарын Бочуоттаах бэрэссэдээтэлэ, Ньурба, Аллайыаха улууһун бочуоттаах олохтооҕо, СӨ Ытык Сүбэ чилиэнэ, суруналыыстар Сойуустарын чилиэнэ Данил Иванович Николаев, СӨ култууратын, үөрэҕириитин туйгуна, Култуура уонна ускуустуба бочуоттаах үлэһитэ, Ньурба улууһун бочуоттаах олохтооҕо, СӨ култууратын үтүөлээх үлэһитэ Марта Романовна Гоголева, СӨ култууратын үтүөлээх үлэһитэ, Малдьаҕар нэһилиэгин, Ньурба оройуонун бочуоттаах олохтооҕо Татьяна Прокопьевна Олесова, маны сэргэ СӨ бочуоттаах бэтэрээнэ, «Ньурбакаан» холбоһук салайааччыта Алевтина Алексеевна Николаева уонна култуура эйгэтигэр бииргэ алтыһан үлэлээн ааспыт култуура үлэһиттэрин ахтыылара киирбиттэр.
Кинигэ сүрэхтэниитэ Вера Павловна сөбүлүүр «Милая мама» ырыатынан саҕаланна, кэлбит дьон тэҥҥэ ылластылар. Вера Иванова олорон ааспыт олоҕун иһирэхтик ахтан, истиҥ ахтыы киэһэтэ буолан ааста.
Антонина Семенова