Ахсынньы 17 күнүгэр Таркаайы уонна Сүлэ нэһилиэктэригэр эдэр исписэлиистэргэ тутуллубут 4 квартиралаах дьиэ үөрүүлээх арыллыылара буолла.
Уопсай дьиэлэри улууска алмаастан киирэр үптэн туттулар. Бэдэрээтчик «Сахастрой 11» ХЭТ.Эдэр үлэһиттэри тыа сиригэр олохсутар сыаллаах тутуллубут дьиэлэргэ Сүлэҕэ 4 учуутал, Таркаайыга 3 учуутал кыргыттар, култуура дьиэтин үлэһитэ уонна биир квартираҕа 88 саастаах, тыыл бэтэрээнэ Анастасия Максимовна киирдилэр.
Бу сайын Таркаайыга улуус баһылыга Алексей Иннокентьев мунньахтыы тиийэ сырыттаҕына Эбээ Настаа диэн ытыктаан ааттыыр кырдьаҕастара олорор улусулобуйатын тупсарарга көмө көрүллэр дуо диэн ыйыппыта. Маныаха сүбэлэһэн баран, соҕотох кырдьаҕаска сылаас, толору хааччыллыылаах квартираны биэрэргэ быһаарыныы ылыммыттара. Инньэ гынан, барыта 9 киһи саҥа сылы саҥа дьиэлэригэр көрсүөхтэрэ.
Нарыйа Васильева, алын сүһүөх кылаас учуутала:
— Былырыын үөрэхпин бүтэрэн кэлэн Сүлэ оскуолатыгар үлэлии сылдьабын. Кэргэним ОДьКХ үлэлиир, балтараалаах кыыстахпыт. Бу биһиги бастакы дьиэбит буолар, олус үөрэбит уонна долгуйабыт. Үөрэхпин бүтэрээт, дьоммуттан чугас буолаары төрөөбүт улууспар үлэлии кэлбитим.
Улууспут салалтатыгар эдэр үлэһиттэри бу курдук өйүүллэригэр улахан махталбытын тириэрдэбит.
Ольга Алексеева, «Талба» культура дьиэтин хореограба:
-Таркаайыга Уус-Майаттан үлэлии кэлбитим биир сыл буолла. Билигин бэйэм саҥа дьиэлэнэн оҕолорбун аҕалтаары дьоллоно сылдьабын. Үс оҕолоохпун, билигин дойдубар бааллар. Онон Саҥа дьылы саҥа миэбэллээх дьиэҕэ оҕолорбун кытары көрсөөрү бэлэмнэнэбин. Онтон ордук дьол билигин миэхэ суох.
Каадырынан хааччыллыы кыһалҕата билигин хас биирдии нэһилиэккэ баар. Эдэр дьон ирдэбилэ атын, бастатан туран – олорор усулуобуйаларын оҥоруохха наада. Бу программа инникитин өссө кэҥээн иһиэҕэ.
Лена Петрова