Бүгүн улуус тыатын хаһаайыстыбатын идэлэх үлэһиттэрин Күнүн чэрчитинэн, күнүс Ньурба к. «Кыталык» КД-гар тыа хаһаайыстыбатын бастыҥ үлэһиттэрин уонна бэтэрээннэрин чиэстээтилэр. Улуустааҕы тыа хаһаайыстыбатын департаменын салайааччыта Леонид Ушканов улуус тыатын хаһаайыстыбатын уонна инники былааннарын туһунан киэҥ хабааннаах иһитиннэрии оҥордо. Салгыы улуус баһылыга Алексей Иннокентев, улуус Сүбэтин бэрэссэдээтэлин солбуйааччыта Иван Акимов, Ньурба к. баһылыга Геннадий Игнатьев, СӨ Тыа хаһаайыстыбаын уонна аска-үөлгэ бэлиитикэтин министиэристибэтин Мелиорация управлениетын Ньурбатааҕы филиалын салайааччыта Алексей Васильев истиҥник эҕэрдэлээтилэр. Өрөбүлэ суох уустук үлэҕэ сылдьар, улуус олохтооторун аһынан-үөлүнэн хааччыйарга үлэлии сылдьар дьулуурдаах уонна тулуурдаах дьоммутугар эҕэрдэ-алгыс үтүө тыллара ананнылар.
Бу күн бастыҥ үлэһиттэр уонна бэтэрээннэр наҕараадаларын туттулар: тыа хаһаайыстыбатын департаменын сүрүннүүр бухгалтера Зинаида Васильева — «СӨ агропромышленнай комплексын бочуоттаах үлэһитэ», «Ньурба» сопхуос бэтэрээнэ Семен Афанасьев, үлэ бэтэрээнэ Алевтина Мартынова, ветсулууспа бэтэрээнэ Антонина Федорова — «СӨ тыатын хаһаайыстыбатын бэтэрээнэ», «Влада» кэпэрэтиип суоппара Леонид Михайлов, «Эрчим» ТХПК ыанньыксыта Наталия Чочанова — «СӨ тыатын хаһаайыстыбатын туйгуна», «Байар» кэпэрэтиип кылаабынай технолога Марианика Николаева, тыа хаһаайыстыбатын бэтэрээнэ Анастасия Андреева — «СӨ астыыр-үөллүүр бырамыысыланнаһын туйгуна», «Куду» бааһынай хаһаайыстыба баһылыга Василий Васильев — «СӨ-гэр сылгыны үөрдээн иитии сайдыытыгар кылаатын иһин», «Байар» кэпэрэтиип суоппара Петр Андреев -«Ньурба улууһун тыатын хаһаайыстыбатын бочуоттаах бэтэрээнэ» наҕараадаларын туттулар. Элбэх киһи Тыа хаһаайыстыбатын министиэристибэтин Бочуотунай грамотатынан, Махтал суругунан, Ил Түмэн сис кэмитиэтин, ТХМ иһинэн Мелиорация управлениетын, улуус, Ньурба куорат, департамент наҕараадаларынан бэлиэтэннилэр.
Геннадий АНТОНОВ