Бу ыйга улууспут баһылыга Алексей Иннокентьев 3 нэһилиэк баһылыктарын кытта СВО зонатыгар айанныахтаахтар. Сэрии уотугар сылдьар дьоммутун көрсүөхтэрэ, дойдуларыттан гуманитарнай көмөнү, баһыылкалары тиксэриэхтэрэ.
Улуус тыатын хаһаайыстыбатын тэрилтэлэрэ көмөлөрүн көхтөөхтүк киллэрэ сылдьаллар. «Күндээдэ» АО икки чиэппэр сылгы этин биэрдэ, итини Антоновкаҕа «Олохтоох ас» эти астыыр сыахтаах урбаанньыт Альберт Васильев ыыһаан уонна хаалаан-суулаан биэрдэ. Альберт Васильев бэйэтэ 4 араас халбаһытын астаан уунна. «Илгэ» кэпэрэтиип саламааттары, «Влада» кэпэрэтиип 6 ыйга тиийэ хараллар үүтүн биэрдилэр. Атын даҕаны тэрилтэлэр эмиэ кыттыһа, көмөлөһө сылдьаллар.
Итини таһынан улуустааҕы тыа хаһаайыстыбатын департаменын салайааччыта Леонид Ушканов быстах хомуурга хабыллан барбыт Ньурбачаан нэһилиэгин тыа хаһаайыстыбатын исписэлииһэ бу күһүн уоппускатыгар кэлэ сылдьан тепловизор үлэспитин, онно кыттыһан 190-тан тахса тыһ. солк. тепловизор ылбыттарын иһитиннэрдэ. Ордубут харчыны буойун кэргэнэ уонна оҕото Санкт-Петербурга баран эмтэнэ сылдьалларыгар ыыппыттар.
Тэриллиилээх, бааһынай хаһаайыстыбаларга, урбаанньыттарга уонна бары көмөлөспүт дьоҥҥо улуустааҕы тыа хаһаайыстыбатын департамена барҕа махталын тиэрдэр.
Геннадий АНТОНОВ