Олунньу 19 күнүгэр Малдьаҕардааҕы Н.Сэмиэнэп аатынан норуот айымньытын киинигэр Улуу Кыайыы 80 сылыгар, Россияҕа Аҕа дойдуну, Саха сиригэр Ийэ дойдуну көмүскээччилэр сылларын чэрчитинэн, Малдьаҕартан төрүттээх Аҕа дойдуну көмүскүүр Улуу сэрии кыттыылааҕа, РСФСР норуотун үөрэҕириитин туйгуна Иванов Алексей Семенович төрөөбүтэ 110 сылыгар аналлаах оҕолорун, аймахтарын көҕүлээһиннэринэн уоланнар ааҕыыларын күрэҕэ буолан ааста.
Алексей Семенович сэриигэ 1943 сыллаахха ыҥырыллан 1945 сылга улаханнык бааһыран, өйө суох сэрии толоонугар сыппыт киһини доҕотторо буланнар, кинилэр көмөлөрүнэн госпитальга эмтэнэн, 1946 сыллаахха дойдутугар тыыннаах эргиллибитэ. Кини Үөһээ Бүлүү оскуолаларыгар нуучча тылын уонна литературатын учууталынан, директорынан 45 сыл устата үлэлээн, үүнэр көлүөнэ ыччаты иитиигэ-үөрэтиигэ олоҕун бүүс-бүтүннүү анаабыта.
Кэргэнинээн учуутал Мария Петровналыын 9 оҕону төрөтөн, иитэн-харайан, үгүс элбэх ыччаты үөрэтэн, дьон-сэргэ ытыктабылын, махталын ылбыта. Бу маннык үтүө киһи туһунан билиһиннэрэр сыаллаах, олус улахан суолталаах сэргэх тэрээһин буолан ааста. Оҕолор бары наһаа кыһаллан бэлэмнэнэн кэлбиттэрэ олус үөртэ.
Барыта 23 оҕо кытынна. «Чуораанчык» уһуйаан оҕолорун ыккардыгар 1 м. – Воронцов Ярик, 2 м. – Иванов Харысхан, 3м. – Касьянов Айоол; алын кылаастарга 1 м. – Семенов Айгылаан, 2м — Воронцов Дима, 3м — Николаев Харысхан; улахан оҕолорго 1м — Кириллин Ренат, 2м — Иванов Алеша, 3м — Эрик Петров буоллулар. Кыайыылаахтар Добун суруктарынан, оҕолоро, аймахтара туруорбут бириистэринэн наҕараадаланнылар.
Алексей Семенович уонна кини бииргэ төрөөбүттэрэ РСФСР үөрэҕириитин үтүөлээх учуутала, Саха АССР норуотун үөрэҕириитин туйгуна туйгуна Мария Семеновна, РСФСР үөрэҕириитин туйгуна, Герой Ийэ Елена Семеновна тустарынан ини-бии Донскойдар ааттарынан музейга анаан стендэ оҥорторбуттара көрдөрүүгэ турда. Бу үс бииргэ төрөөбүт учууталлартан удьуор утума салҕанан, 756 сыл педагогическай үлэ стажтаах Ивановтар династиялара өрөспүүбүлүкэ араас муннугар ситиһиилээхтик үлэлии-хамсыы сылдьаллар.
Үтүө дьон үтүө ыччаттара төрөппүттэрин үйэлэргэ ааттата тураллара бука барыбытыгар үтүө холобур буолар!
Елена Иванова