Бүгүн улуус дьаһалтатын 4 үлэһитэ сарсыарда 6 чааска «Ньурба-Агро МТС» тэрилтэҕэ тиийэн ыанньыксыттары солбуйан үлэлээтилэр. Аппараатынан ынах ыатылар, аҕыйах илиинэн ыанар ынах баарын илиинэн эмиэ ыатылар, саах күртүлэр. «Сарсыарда хотон үлэһиттэрэ эмиэ бааллара, онон кинилэри сынньаттыбыт дуу, суох дуу», — диэн улуус дьаһалтатын хоһуун кыргыттара күлсэллэр.
Сарсыардааҥҥы үлэ десанын туһунан бүгүн сарсыарда улуус баһылыга Алексей Иннокентьев Телеграм-каналыгар суруйда. «Бүгүн — Хомсомуол күнэ, күүрээннээх эдэр сааспыт кэрэ өйдөбүлэ, — диир Алексей Михайлович. — Аҕам саастаах уонна орто саастаах дьон бары кэриэтэ даҕаны хомсомуолга уһаарыллан таҕыстахпыт. Оччолорго хомсомуоллар ханнык даҕаны үлэттэн туора турбаттара, тыа сиригэр производствоҕа элбэх хомсомуол үлэлиирэ. Ол кэмҥэ даҕаны хонтуора үлэһиттэрэ сопхуос үлэһиттэрин баран солбуйар үгэстэрэ баара. Манна эбэн эттэххэ, Ийэ ыйын улууска тэрийэн ыытар хамыыһыйа мунньаҕар өрөбүлэ суох үлэлиир ыанньыксыттары баран солбуйар туһунан этии киирбитэ.
Киэһээҥҥи ыамҥа ыанньыксыттары солбуйа улуус Сүбэтин бэрэссэдээтэлэ Нюргуяна Михайлова, улуус Сүбэтин исписэлииһэ Виктория Степанова уонна улуустааҕы счетнай-хонтуруоллуур палаататын үлэһиттэрэ тиийиэхтэрэ. Улуус дьаһалтатын уонна улуус Сүбэтин үлэһиттэрэ эмиэ тыаттан төрүттээх дьон буоллахтара, онон ханнык даҕаны үлэттэн туора турбаттар. «Ньурба-Агро МТС» АО улуустааҕы СВО фондатыгар бэйэтин улахан кылаатын киллэрэр, онон улуус салалтатын аатыттан бүгүҥҥү субуотунньук кинилэргэ махтал бэлиэтэ», — диэн түмүктүүр улуус баһылыга.
«Ньурба» хаһыат