Тохсунньу 27 к. улуус ааспыт сыллаах үлэтин отчуота түмүктэннэ. Отчуоттуур мунньахтарга барыта 1511 киһи кытынна, тус боппуруостарынан приемҥа 115 киһи сырытта.
Улуус үлэтин отчуота бүтэһигинэн бэнидиэнньиккэ Ньурба куоракка ыытылынна. Ньурбаҕа отчуокка 220 киһи, тус көрсүһүүгэ араас боппуруостаах 4 киһи сырытта. Доруобуйа харыстабылыгар, куорат хаһаайыстыбаннай үлэтигэр, ты хаһаайыстыбатыгар уо.д.а. сыһыаннаах ыйытыктар киирэн хоруйданнылар. Ньурбаҕа хараҕы аппаратнай эмтээһин туһунан ыйыталлар. Ньурбатааҕы поликлиникаҕа офтальмологическай кабинет Дьокуускайдааҕы харах балыыһатын филиалын быһыытынан үлэлиир, улуустааҕы киин балыыһа кабинеты оборудованиенан уонна быраастарынан ситэри хааччыйарга эбэтэр офтальмологическай кабинеты ЦРБ-га биэрэн үлэлэтэргэ туруорсар. Улуус баһылыга Алексей Иннокентьев социальнай боппуруостарга солбуйааччыта Наталия Петроваҕа ЦРБ-ны кытта манна үлэлэһэригэр, СӨ ситэриилээх былааһын отчуотугар боппуруоһу туруорсарга эттэ.
СВО буойуттарыгар, кинилэр дьиэ кэргэттэригэр көмө уонна сыһыан туһунан этэллэр. Алексей Иннокентьев сүтүктээх дьон аһыытын, кыһалҕатын бары өйдүөх тустаахтарын уонна кинилэргэ бастакы уочарат бары көмө оҥоһулларыгар кыһаныахтаахтарын бэлиэтээтэ. Тэрээһиннэри патриотическай хабааннаахтык ыытыллыахтаах, бу сэрии саҕана олунньуга Аҕа дойдуну көмүскээччилэрин күннэрин саҕана Ньурбаҕа былааннаммыт 2 күннээх өрөспүүбүлүкэтээҕи «Кыайыы оһуокайа» тохтотуллар.
Ыраах Убайаан олохтоохторо В.Потапова уул. оҥоһуллуутун, сайыҥҥы уу ситимэ тардыллыытын туһунан ыйыттылар. Ньурба куорат салалтатын кытта суол боппуруоһугар сүбэлэһиэхпит диэтэ улуус баһылыга.
«Убайааҥҥа киирбит уу ситимэ федеральнай суолу туоруура уустуктардаах, ол эрээри альтернативнай марштруту — өрүстэн пляжка барар суолунан кыйа тардыыны көрбүппүт. Быйыл Сэбиэскэй түөлбэ сайыҥҥы водопровода холбонор уонна «Маслозавод» түөлбэ киэнэ оҥоһуллар, биирдэ барыта кыайан оҥоһуллубат», — диэн хоруйдаата куорат баһылыгын солбуйааччыта Павел Необутов.
Убайаан модельнай бибилэтиэкэтин Интэриниэтин уонна дьиэтин өрөмүөнүн туһунан ыйытыктар киирдилэр. Улуустааҕы кииннэммиит бибилэтиэкэ ситимин дириэктэрэ Анна Багмет хоруйдаабытынан, Убайааннааҕы бибилиэтиэкэҕэ Интэриниэти үбүн быһааран холбуохтара. Бибилэтиэкэ дьиэтин сылытарга өрөмүөн үлэтин былааҥҥа киллэрэргэ сорудахтанна. Итини таһынан Куоначчаан муостатын, ынах төбөтүгэр субсидия, Убайаан спорт саалатын туһунан уо.д.а. боппуруостар киирэн хоруйданнылар.
Итинэн улуус ааспыт сыллаах үлэтин отчуота түмүктэннэ. Дьон-сэргэ отчуокка кыттыылара көхтөөх, улууска, нэһилиэктэригэр баар кыһалҕаларын, туруорсууларын этиннилэр. Улуус бары нэһилиэктэригэр уонна Ньурба куоракка улуус олохтоохторо улуус ааспыт сыллаах үлэтин биһирииллэрин биллэрдилэр.
Геннадий Антонов