Тохсунньу 20 күнүттэн улуус ааспыт сыллааҕы үлэтин отчуота нэһилиэктэринэн ыытылла турар. Бастакы күн улуус баһылыга Алексей Михайлович Иннокентьев салайааччылаах оробуочай бөлөх Мэҥэдьэк, Бордоҥ уонна Малдьаҕар нэһилиэктэрин олохтоохторун иннигэр отчуоттаата. Бөлөххө улуус баһылыгын солбуйааччылара Эдуард Мярикянов, Наталия Петрова уонна улуус тэрилтэлэрин салайааччылара киирэн үлэлээтилэр. Отчуокка дьон көхтөөхтүк кытынна, ол курдук Хатыыга – 45, Маалыкайга – 147 уонна Малдьаҕарга – 49 киһи сырытта.
Мэлдьи буоларын курдук, отчуот иннинэ дьону тус боппуруостарынан приемнааһын буолла. 3 нэһилиэгинэн приемҥа 10 киһи сырытта. Хатыыга дьиэ өрөмүөнүгэр уонна доруобуйа харыстабылыгар сыһыаннаах боппуруостар киирдилэр. Ол иһигэр Дьокуускайтан мобильнай биригээдэни кытта кэлбит нейрохирурга көрдөрөр туһунан ыйыттылар, онно кини бу ый 22 күнүгэр наадалаах бырааһыгар консультацияҕа киирэрэ быһаарылынна. Итини таһынан чэпчэтиилээх эминэн хааччыйыы, окулиска консультацияҕа сылдьыы, биэнсийэлээхтэргэ босхо бырайыас, тыа хаһаайыстыбатыгар үлэ ыстааһын, биэнсийэ мунньуллар чааһын туһунан ыйытыктар киирэн хоруйданнылар. Маалыкайдааҕы «Мичил» оҕо уһуйаана быйыл үбүлүөйдээх сыла, оҕо уһуйаанын сэбиэдиссэйэ Светлана Пестрякова өрөмүөн боппуруоһун киирэн чопчуласта. Малдьаҕарга быйылгы Улуу Кыайыы үбүлүөйдээх 80 сылын көрсө, 2 кинигэни таһаарарга бэлэмнээбиттэр: РФ үөрэҕириитин бочуоттаах үлэһитэ Татьяна Саввинова уонна СӨ култууратын туйгуна Елена Иванова — «Кэлэр көлүөнэҕэ кэс тыл» кинигэни уонна СӨ үтүөлээх учуутала Данилов Н.Д. «Сэрии ыам кэмнэрин туораан, олох туһугар охсуһуу» кинигэни.
Отчуоттуур мунньахтарга Хатыыга — өрүскэ киирэр суол өрөмүөнүн, бэкээринэ, төрүүр ынахха көрүллэр субсидия, өртөөһүн, нэһилиэккэ тренери 0,5 штаты салгыы үлэлэтии; Маалыкайга — гаастааһын, оскуола дьиэтин өрөмүөнүн, доруобуйа харыстабылын, тыа хаһаайыстыбатыгар киирэр уларыйыылар; Малдьаҕарга – суолга ууну аһардар муосталары оҥоруу, тыа хаһаайыстыбатыгар киирэр уларыйыылар, спорт саалатын ититиитин ситимин өрөмүөнүн, оскуола иһинээҕи ититиитин ситимин сууйтарыы (промывка), Накыыҥҥа «Саха» НКИХ биэриитэ көстүбэтин уо.д.а. боппуруостар киирэн хоруйданнылар.
Сүрүннээн тыа хаһаайыстыбатыгар киириэхтээх уларыйыылар тустарынан көхтөөх кэпсэтиилэр бардылар, төрүүр ынахха төлөнөр субсидия туһунан санааларын үллэһиннилэр. Манна дьон санаата араас: сорохтор оннунан хаалларарга туруорсаллар, сорохтор үүккэ биэрэргэ этэллэр. Улуус баһылыга Алексей Иннокентьев нэһилиэктэргэ улуустааҕы тыа хаһаайыстыбатын департамена Уопсастыбаннай сэбиэтин чилиэннэрин кытта нэһилиэктэргэ сылдьан дьон санаатын үөрэтиэхтэрин, сүбэлэһиэхтэрин, ол кэнниттэн сөптөөх быһаарыы ылыныахтарын иһитиннэрдэ. Биллиилээх сылгыһыт, СӨ Госпремиятын лауреата Александр Николаевич Самсонов Ньурбаҕа кытай тыраахтырын уонна саппаас чаастары атыылыыр маҕаһыыны аһарга, нэһилиэктэргэ барыларыгар кэпэрэтииптэри тэрийэргэ санаатын эттэ.
Ити курдук быйылгы отчуот маҥнайгы күнэ түмүктэннэ. Үс нэһилиэк олохтоохторо улуус ааспыт сыллааҕы үлэтин биһирииллэрин биллэрдилэр.
Геннадий АНТОНОВ