Бэҕэһээ 12 ч. СИА былаһааккатыгар архитектура уонна дизайн эйгэтигэр «Эйгэ-2024» бириэмийэ чэрчитинэн «Саха сирин талан ылыыта» норуот куоластааһынын түһүмэҕэ түмүктэммитэ. Биһиги үөрүөхпүт иһин, 15 номинацияттан иккитигэр улууспут эбийиэктэрэ кыайыылаах таҕыстылар: «Инфраструктура уонна бырамыысыланнас бастыҥ эбийиэгэ» — Марха муостата уонна «Социальнай эбийиэктэр бастыҥ интерьердара» — К.Д.Уткин аатынан Норуоттар доҕордоһууларын түмэлэ. Бу туһунан бэҕэһээ киэһэ улуус баһылыга Алексей Иннокентьев бэйэтин Телеграм-каналыгар суруйда.
«Марха (Ньурба) улууһа тэриллибитэ 200 сылыгар уочараттаах улахан ситиһиинэн улууспут олохтоохторун, ыраах-чугас баар биир дойдулаахтарбытын уонна бары куоластаабыт дьону истиҥник эҕэрдэлиибин уонна истиҥ махталбын тиэрдэбин!» — диэн түмүктээтэ баһылык.
«Ньурба» хаһыат