Улууспутугар икки хос улахан үөрүүлээх сонун кэллэ! СӨ Ыччат министиэристибэтин сылы түмүктүүр тэрээһинигэр улууспут ыччаттарын быйылгы үлэлэрэ үрдүк сыанабылы ылан, улууспут үбүлүөйдээх 200 сылыгар олус үчүгэй бэлэҕи оҥордулар. Ньурба улууһа «СӨ гражданскай уопсастыба институттарын сайыннарыыга бастыҥ муниципальнай оройуон» аатын сүктэ. Итини сэргэ улуустааҕы ыччат дьыалатын уонна имидж политикатын управлениетын салайааччыта-улуус баһылыгын бырайыактыыр үлэҕэ уонна уопсастыбаннаһы кытта сибээскэ солбуйааччыта Валерия Гаврильевна Владимирова «Прорыв года» номинация кыайыылааҕа буолла.
Итинэн Ньурба улууһун ыччата СӨ «Муус Устар» бэстибээлгэ уонна СӨ ыччатын «Табыс» бэстибээлигэр ситиһиилэрин өссө чиҥэтэн, үрдүк көрдөрүүлэри ситистэ. Бу туһунан улуус баһылыга Алексей Иннокентьев бэҕэһээ киэһэ бэйэтин Телеграм-каналыгар суруйда.
«Элбэх идиэйэлээх, үлэҕэ олус көхтөөх уонна саҥаны-сонуну түргэнник ылсан олоххо киллэрэр иһэр ыччаттарбытынан киэн туттабыт, — диэн бэлиэтиир Алексей Михайлович. — Былырыын өрөспүүбүлүкэ улуустарыттан бастакынан проектнай отделы тэрийбиппит көдьүүстээҕин көрдөрдө. Кинилэр нэһилиэктэргэ, уопсастыбаннай түмсүүлэргэ көмөлөһөн, улууспут грантовай куонкурустарга көхтөөхтүк уонна ситиһиилээхтик кыттар буолбутун бэлиэтиибин. Валерия Гаврильевнаҕа уонна кини салайар кэлэктиибигэр салгыы дьоһун ситиһиилэри, дьолу-соргуну, чэгиэн доруобуйаны баҕарабын!»
«Ньурба» хаһыат