Балаҕан ыйын 11 күнэ биһиэхэ өссө биир соһуччу үөрүүнү бэлэхтээтэ. Бастаан Быыбар этэҥҥэ түмүктэнэн күммүт кытта үөрэн чаҕылыччы тыган турдаҕына 47 сыл үлэлээбит оскуолам оҕолоро кэлэн хортуоскабытын хостоон, кууллаан, гаражка таһан биэрдилэр. Ол кимнээҕий?
Советскай Союз Геройа Н.Н. Чусовской аатынан Антоновка орто оскуолатын 10 «в» «Уоланнар» кылаастара, салайааччы Софронов Марк Афанасьевич. Оскуолаларын хортуоскатыгар субботниктаан баран үргүлдьү кэлэн биһиги хортуоскабытын кэлэн хостоон биэрдилэр. Уоланнар оскуолабыт биир бастыҥ кылааһа. Манна бааллар оскуола, нэһилиэк киэн туттар спортсменнара: мас тардыһааччылар, боксердар, тустууктар, хайыһардьыттар; үҥкүүһүттэр, араас таһымнаах олимпиадалар, НПК кыттыылаахтара.
Уолаттар бары оскуола, нэһилиэк общественнай олоҕор актыыбынайдык кытталлар.
Махталбытын этэн туран уолаттарга үөрэххитигэр, спортка, талан ылбыт дьарыккытыгар ситиһиилэри, үөрэммит, үлэлээбит оскуолам улахан коллективыгар иитэр-үөрэтэр, үгүс сыраны, тулууру, дьулууру эрэйэр айымньылаах үлэҕитигэр ситиһиилэри баҕарабыт. Доруобай, дьоллоох буолуҥ!
Егорова Светлана Васильевна, оскуола ветеран учуутала.