«Уот Дьулустаан» киинэ сериалга Ньурба артыыстара уһулуннулар

Тохсунньу 27 күнүгэр «Саха» НКИХ ханаалыгар «Уот Дьулустаан» диэн Валентина Гаврильева сэһэнигэр олоҕуран уһуллубут саҥа сериал көстөн саҕаланна. Сценарийын  Катерина Григорьева-Кэрэмэс Сыдьаай суруйбут, режиссер Елена Эверстова.

Бу сериалга биир сүрүн оруолу оонньообут СӨ култууратын туйгуна, тыйаатырга сүрүн режиссерунан үлэлээбит Алгыс–Сиэн Мөрөс: “Бу сериалы кытта сибээстээх биир түгэн баар, 1991 сыллаахха аҕам Юрий Алексеевич Ньурба тыйаатырыгар бу сэһэнинэн бастакы режиссерскай үлэтин туруорбута.  Онтон  33 сыл буолан баран мин сүрүн оруолга тиксибитим дьикти буолбат дуо?

Ааспыт сайын от уонна атырдьах ыйдарыгар Таатта улууһугар Чөркөөххө Д.К. Сивцев-Суорун Омоллоон  аатынан историко-этнографическай түмэлгэ уһуллубуппут. Чөркөөххө бастакыбын сылдьыбыт буоламмын олус долгуйбутум уонна астыммытым. Уопсайынан, Таатта остуоруйа дойдутун курдук эбит, хас биирдии дьиэ, хас биирдии уулусса, этэргэ дылы, үүнэн турар мастар, тыа барыта история. Улуу дьоннорбут төрөөн-үөскээн, олорон, сүүрэн-көтөн ааспыт сирдэрэ буолар, онон салгынныын да атын этэ.”

Артыыска Анисья Колесова: «Уот Дьулустаан» сериал уһулларын туһунан мин саас истибитим уонна сэмээр «арай мин хапсыам эбитэ дуу?» диэн ымсыыра санаабытым. Араастаан ыйыталаһа сатаабытым даҕаны, «эйиэхэ сөптөөх оруол суох» диэбиттэрэ. Кэллиэгэм Майя Петровна нөҥүө сериал уһулла сылдьарын ээр-сэмээр билэ сырыттым. Этэҥҥэ сайыҥҥы уоппускабыт бүтүүтэ Ньурбалаарыбын, дойдубуттан Арбынтан Дьокуускайга кэллим.

Биир киэһэ интернет ситимигэр «Чөркөөххө уһулла сылдьар сериалга эдэр кыыһы көрдүүбүт. Оҥоһуу кыламана, тыҥыраҕа суох буолара ирдэнэр» диэн халыыптаах биллэриини көрдүм эрэ көрбөтүм, линейнэй продюсерга Уйгулаанаҕа суруйдум. «Сарсыарда биллэриэхпит» диэн буолла. Арай, сарсыарда 8 чааска «Кэл» диэн суруйда. Хомунан, биирдэ Чөркөөххө баар буола түстүм уонна үс күн уһуллууга кыттыстым. Улуу суруйааччылар төрөөбүт дойдуларын, аатырбыт Таатта үрэҕи илэ харахпынан көрбүт дьоллоохпун. Мин сериал бүтүүтүн диэки көстүөхтээхпин, Алтан Сирэй диэн олус бэртээхэй оруоллаахпын.

«Уот Дьулустаан» сериал режиссера Елена Эверстоваҕа мин иккис үлэм, бастаан уһуллубут сериалбынан «Мин таптыыр спутнигым» буолар. Ол иһин бэркэ өйдөһөн, түргэнник үлэлээбиппит. Ол эрэн, тоҕо бастаан оруолга ылбатахтарын, кэлин ылбыттарын туһунан көрөөччүлэр бэйэлэрэ сериалга көрдөхтөрүнэ өйдүөхтэрэ дии саныыбын, нууччалыы эттэххэ, онно «оправдайдаабыппыт» оруолбун.

СӨ үтүөлээх артыыската Майя Слепцова: «Ньурба тыйаатырыгар Юрий Макаров туруорбут испэктээгэр Уот Дьулустаан оруолун СӨ ускуустубатын үтүөлээх диэйэтэлэ Александр Титигиров, Ырыачайы СӨ үтүөлээх артыыската Александра Кривогорницына, Сүөкүлэни СӨ норуодунай артыыһската Валентина Николаева, Аҥар Харах оруолун Саха АССР үтүөлээх артыыһа Дмитрий Иванов толорбуттара. Олоҥхоһуту РФ уонна Саха АССР үтүөлээх артыыһа Петр Николаев оонньообута. Оттон Аҥар харах ойоҕун Валентина Новгородова-Апросимова, Балыксыты СӨ норуодунай артыыһа Борис Борисов толорбуттара. Сериалга  мин Сүөкүлэ оруолун толоробун.

Испэктээк чаастан ордук барар буоллаҕына киинэбит сүүрбэ сериялаах буолбут. Киинэ атына диэн хартыыналарын уһулуу айылҕаттан, күнүттэн тутулуктаах буолар. «Эбээ Маайа» ханаалбар Валентина Гаврильева «Болугур айыыта» кинигэтигэр баар сэһэннэри аахпытым, Уот Дьулустаан баар буолуохтаах, айымньытын ис хоһоонун билиэн баҕалаахтар истээриҥ.

Режиссер Елена Эверстоваҕа «Сүлүһүннээх таптал» сериалга  уһулларбар ийэлээх аҕам барахсаттар олорбут олохторун билбитим диэххэ сөп, оттон «Уот Дьулустааҥҥа»  өбүгэлэрбит, хос эбэлэрбит, эһэлэрбит олорбут былыргы олохторугар кэми эргитэн төннөн ылбыт курдук сананным».

Саҥа сериалга СӨ култууратын туйгуна Дмитрий Слепцов Кууһума, СӨ култууратын туйгуна Сардаана Михайлова Сабыстай оруолларын толорбуттарын көрүөхпүт оттон эдэр артыыс Никита Григорьев Хабырыыс оруолугар кыттыбытын таһынан режиссер көмөлөһөөччүтүн быһыытынан үлэлэспитэ.

Күндү көрөөччүлэр, саҥа сыл бастакы сонун сахалыы сериалын көтүппэкэ көрүҥ диэн ыҥырабыт!

Хаартыскаҕа: Колесова Анисья, Дмитрий Слепцов.

Ньурба театрын пресс-сулууспата