Бэҕэһээ киэһэ улуустааҕы ыччат дьыалатын уонна имидж бэлиитикэтин управлениетын салайааччыта Валерия Владимированы уонна Ньурба 3 №-дээх оскуолатын завхоһа Николай Игнатьевы кытта Дьаархаҥҥа тахсыһа сырыттым. Уота суох олорор нэһилиэккэ Ньурба тэрилтэлэриттэн уларсыллыбыт генератордары таһааран биэрдибит. Николай Игнатьев сааскы халаан уутунан улууска 3 нэһилиэнньэлээх пууҥҥа ыксаллаах быһыы-майгы биллэриллиэҕиттэн, тэрилтэтин массыынатынан бэйэтэ суоппардаан үһүс күнүн Дьаархаҥҥа аһы-үөлү, наадалаах малы-салы таһа сылдьар эбит.
Тиийэрбитигэр эргэ кулууп дьиэтин таһыгар мустубут олохтоохтор уу түһэн эрэр диэн кэпсии тоһуйдулар, генератордары кимиэхэ анаммытынан тустаах аадырыстарыгар тиксэртээтилэр. Уу сыырга тахсан ыла сылдьыбыт сирдэриттэн чугуйбут, Марха мууһа халҕаһалыы устар.
Дьаархан баһылыга Станислав Конощук: «Уу таһыма түһэ турар, мууспут барда. Маар Күөлүнэн уубут түһэрин кэтэһэбит. Бэнидиэнньиктэн уота суох олоробут, генератордарынан уоттанан олоробут. РЭС-тэр уу түстэ даҕаны кэлэн көрүөхпүт, куурдан-хайаан баран сонно холбуохпут диэбиттэрэ. Уу кэлэ сылдьан 2 уопсай дьиэни, ДПК гараһын уонна 1 чааһынай дьиэни ылбыта. Ону тахсан аакта оҥорбуттара, хамыыһыйа тэриллибитэ. Төһө хоромньу тахсыбытын көрүөхпүт. 60-ча киһи Ньурбаҕа киирбиттэрэ, ол иһигэр 11 оҕо уонна аҕам саастаах дьон. Билигин нэһилиэкпитигэр 240 киһи баар.
Хас күн аайы ыччаттар, үлэһиттэр, тэрилтэлэр салайааччылар бары кэлэн үлэлии сылдьаллар. Аһылык астааһыныгар 10-ча кыыс үлэлиир, олохтоохтор, ГИМС, полиция, РЭС, Быыһыыр сулууспа үлэһиттэрэ – барыта холбоон 50-ча киһи буолан дьуһуурустубалыы сылдьабыт. Улуустааҕы КЧС салайар састааба күннэтэ кэлэн билсэ, балаһыанньаны хонтуруолла турар».
Өрүстэн уу тахсан быспыт уулуссаларын уонна намыһах сирдэрин үрдэтэн, халаан уутун бохсон элбэх үлэ барбыта көстөр. Манна олохтоохторго Ньурбаттан тэрилтэлэр үлэһиттэрэ, тиэхиньикэлэрэ тахсан көмөлөспүттэрэ. Уу
түһэригэр биэрэк кытыытыгар улахан муус халҕаһалара олорон хаалбыттар.
Сэрии сылларын оҕото, 83 саастаах үлэ бэтэрээнэ Ульяна Антонова: «5 күн уота суох олоробут, морозильниктан аһылыкпын оҥкучахха түһэрбитим. Хата, бүгүн Сата арыытыгар харыы төлөрүйэн этэҥҥэ уубут таһыма түһэ турар диэн үөрэбин. Дьон-сэргэ уу кэлбитигэр намыһах сирдэринэн уу халыйарын бохсон, үлэ бөҕөнү көрдүлэр. Кыаллар түгэнигэр уоппутун уһаппакка холбууллара буоллар диэн баҕалаахпыт. Эрдэ маннааҕар элбэх уу 1959 с. бэс ыйыгар, мин оскуолаҕа үөрэнэрбэр кэлэн өр баҕайы турбутун өйдүүбүн. Өрөбүлгэ Маартан кэлэрбэр Кубалааҕынан быарбытыгар диэри ууну кэһэн туоруурбут».
Бүгүн Ньурбатааҕы РЭС үлэһиттэрэ Дьаархан подстанциятын көрө-истэ тахсаллар, сатанар буоллаҕына уоту уһаппакка холбуур сорук турар.
Геннадий Антонов