Алтынньы 6 к. V ыҥырыылаах улуус Сүбэтин бастакы тэрээһин сиэссийэтэ ыытылынна. 19 дьокутааттан СВО-ҕа кытта сылдьар Ньургун Дмитриевтэн ураты, 18 дьокутаат бары бааллар. Маннык түгэннэргэ үгэс буоларын курдук, дьокутааттартан аҕа саастаахтара ыытар, онон сиэссийэ үлэтин киин быыбардыыр уокуруктан Валентина Васильева салайан саҕалаата. Улуус Сүбэтин 15 сыл устата салайан үлэлэппит Сергей Евсеев куйаар ситиминэн холбонон эҕэрдэлээтэ, улууспут инники сайдыытын туһугар биир санаанан күүскэ үлэлииллэригэр алгыһын анаата.
Бастакынан улуус Сүбэтин маҥнайгы тэрээһин сиэссийэтин 3 киһилээх мандатнай хамыыһыйата талылынна. Мандатнай хамыыһыйа аатыттан Иван Гаврильев балаҕан ыйын 8-10 кк. быыбардар түмүктэринэн улуус Сүбэтин дьокутааттарын боломуочуйаларын билинэр туһунан быһаарыыны ааҕан иһитиннэрдэ. Дьокутааттар биир сүбэнэн бу быһаарыыны уонна улуус Сүбэтин бастакы тэрээһин мунньаҕын регламенын бигэргэттилэр.
3-с боппуруоһунан улуус Сүбэтин бэрэссэдээтэлин туһунан боппуруос көрүлүннэ. Саҥа талыллыбыт дьокутааттары эҕэрдэлээн улуус баһылыга Алексей Иннокентьев тыл эттэ уонна улуус Сүбэтин бэрэссэдээтэлигэр улахан уопуттаах дьокутаат быһыытынан Нюргуяна Михайлова кандидатуратын киллэрдэ. Дьокутаат Ньургун Дмитриев улуус Сүбэтин бэрэссэдээтэлигэр туруоруммут сайабылыанньатын ыыппыт. Дьокутааттар дьүүллэһэн уонна Нюргуяна Михайлова информациятын истэн баран, кистэлэҥ куоластааһынынан биир санаанан Нюргуяна Михайлованы улуус Сүбэтин бэрэссэдээтэлинэн таллылар.
Нюргуяна Михайлова улуус дьонугар-сэргэтигэр биллэр салайааччы: 2004 сылтан улууска дьоҕус фонданы өйүүр фонда, урбааны өйүүр Киин салайааччытынан үлэлээн кэллэ, кэлиҥҥи дуоһунаһа – урбаан, эргиэн уонна олохтоох оҥорон таһаарыы департаменын салайааччыта. Өрөспүүбүлүкэҕэ биллэр-көстөр көхтөөх уопсастыбанньык. 1,2 уонна 3-с ыҥырыылаах Ньурба к. Сэбиэтин дьокутаата, 4-с ыҥырыылаах улуус Сүбэтин бүддьүөккэ уона экэнэмичэскэй бэлиитикэҕэ бастайааннай хамыыһыйатын бэрэссэдээтэлэ, «Биир ньыгыл Арассыыйа» баартыйа оройуоннааҕы политсоветын чилиэнэ, Ньурбатааҕы техлицей Салайар сэбиэтин бэрэссэдээтэлэ, улуустааҕы остуол оонньууларын Федерациятын бэрэссэдээтэлэ.
Улуус Сүбэтин бэрэссэдээтэлин солбуйааччытынан Убайааннааҕы быыбардыыр уокуруктан дьокутаат Иван Акимов талылынна. Сиэссийэҕэ дьокутааттар 7 бастайааннай хамыыһыйаны бигэргэттилэр, хамыыһыйалар бэрэссэдээтэллэрин уонна чилиэннэрин таллылар. Бэрэссэдээтэллэринэн буоллулар: сокуоннаска, олохтоох салайыныыга, бас билиигэ уонна экологияҕа бастайааннай хамыыһыйа – Леонид Владимирович Ушканов; бүддьүөт, үп уонна нолуок бэлиитикэтин хамыыһыйата – Данил Валерьевич Иванов; аграрнай бэлиитикэ, урбаан, үлэ уонна дьарыктаах буолуу хамыыһыйата – Юрий Багкалиевич Елеусизов; тутуу уонна ОДЬКХ хамыыһыйата – Альберт Алексеевич Васильев, социальнай бэлиитикэ, үөрэх уонна култуура дьыалатыгар хамыыһыйа – Мотрена Прокопьевна Захарова; патриотическай иитиигэ, уопсастыбаннай тэрилтэлэргэ уонна СВО дьыалатыгар хамыыһыйа – Валерия Гаврильевна Владимирова; мандатнай хамыыһыйа – Иван Дмитриевич Гаврильев.
Бастайааннай хамыыһыйалар бэрэссэдээтэллэрэ улуус Сүбэтин Президиумугар киирэллэр. Улуус Сүбэтин бэрэссэдээтэлэ Нюргуяна Михайлова дьокутааттарга дастабырыанньаларын уонна значоктарын туттарда. Сиэссийэҕэ кыттыбыт салайааччылар дьокутааттарга ситиһиилээх үлэни баҕардылар.
Геннадий АНТОНОВ.