Бүгүн, ыам ыйын 13 күнүгэр Ыраах Убайааҥҥа — биир дойдулаахпыт, сахалартан бастакы поэтесса Варвара Потапова түмэл дьиэтигэр төрөөбүт күнүгэр анаан тэрээһин буолла.
Бибилэтиэкэ үлэһиттэрэ сөрүүн күҥҥэ кэлбит ыалдьыттары итии чэйинэн, алаадьынан көрүстүлэр.
Улуустааҕы киин бибилэтиэкэ уонна «Ньурба уоттара» түмсүү» Варвара Потапова «Мин да оҕо этим…» хоһоонун көҥүл тылбаас оҥорорго күрэх ыыппытын, бүгүн түмүк тахсарын туһунан киин бибилэтиэкэ кыраайы үөрэтэр салаатын бибилэтиэкэрэ Маргарита Романовна Ноева иһитиннэрии оҥордо.
Бүгүн Варвара Потапова төрөөбүт тэлгэһэтигэр «Мин да оҕо этим…» хоһоонун күрэх кыттааччылара нууччалыы, англия, немец, кытай тылынан ааҕан иһитиннэриилэрэ ураты сонун көстүү буолла.
Ньурбаттан дьүүллүүр сүбэҕэ үлэлээбит СӨ үөрэҕириитин туйгуна, Ньурбатааҕы киэһээҥи оскуола директора Наталья Михайловна Иннокентьева күрэх түмүгүн иһитиннэрдэ уонна кыайыылаахтарга наҕараадалары үөрүүлээх быһыыга-майгыга туттартаата.
Улуус дьаһалтатын персоналы салайар сулууспа салайааччыта Ольга Ивановна Афанасьева, улуустааҕы үөрэҕирии салаатын сүрүннүүр исписэлииһэ Василий Николаевич Семенов Варвара Потаповаҕа, мустубут дьоҥҥо анаан тыл эттилэр.
Ньурба тыйаатырын артыыстара Александра Криговорницына уонна Людмила Васильева Варвара Потапова хоһоонноруттан ис дууһаларыттан ааҕан мустубут дьону долгуттулар.
Аны күһүн тылбаастаммыт хоһооннор кинигэ буолан тахсарыгар бүгүҥҥү тэрээһин кыттыылаахтара баҕа санааларын эттилэр.
Сиһилии «Ньурба» хаһыат кэлэр нүөмэригэр ааҕаарыҥ.
Антонина Семёнова