Балаҕан ыйын 16-18 кк. улуустааҕы ыччат бэлиитикэтин управлениетын салайааччыта Валерия Владимирова «Академия Тим-лидера» диэн ыччат лиидэрдэригэр аналлаах үөрэххэ баран кэллэ. Бу туһунан Валерия Гаврильевна маннык иһитиннэрдэ:
«Академия Тим-лидера» үөрэх Хаҥалас улууһун Өктөмүгэр Дьоҕус Наукалар академияларын базатыгар буолла. Эһиил Дьокуускайга «Азия оҕолоро» норуоттар икки ардыларынааҕы Спортивнай оонньууларга волонтерскай үлэни тэрийии туһунан. Бу Оонньууларга барыта 2 тыһ. волонтеры үлэлэтэргэ былаанныыллар, ол иһигэр дойду атын регионнарыттан уонна тас дойдулартан эмиэ. Волонтердарга 100 тим-лиидэрдэр көмөлөһүөхтэрэ уонна кинилэр үлэлэрин сүрүннүөхтэрэ. Онно бэлэмнээн тэрийээччилэр 80 киһини талан үөрэттилэр. Миигин кытта Сүлэ нэһилиэгин ыччат бэлитиикэтигэр исписэлииһэ Андреева Ньургуйаана сырытта.
3 күн устата «Азия оҕолоро» Оонньууларга волонтерскай үлэни тэрийэргэ кэрэхсэбиллээх лиэксийэлэри иһиттибит, маастар-кылаастарга, трениннэргэ, квест-оонньууларга кытынныбыт. Хамаанданы үөскэтиигэ, үлэ кэмигэр үөскүүр араас сытыы түгэннэри дириҥэппэккэ сөптөөхтүк быһаарсан иһэргэ, дьону волонтерскай үлэҕэ хайдах кытыннарарга уо.д.а. үлэ хайысхаларыгар үөрэннибит. Урукку сыллардааҕы «Азия оҕолоро» Оонньуулар историяларын, волонтердар үлэлэриттэн билиһиннэрдилэр. «Азия оҕолоро» Оонньуу норуоттар икки ардыларынааҕы отделын салайааччыта Сардаана Жендринская «Основы межкультурного взаимодействия с участниками азиатских стран» диэн интэриэһинэй лиэксийэни ыытта. Култуурунай сынньалаҥ быһыытынан СӨ Бастакы Бэрэсидьиэнэ Михаил Николаев бибилэтиэкэ-архыыбыгар экскурсияҕа сырыттыбыт. Онтон бүтэн баран «Азия оҕолоро» Оонньуулар эбийиэктэригэр экскурсияҕа сырытыннардылар.
Биһиги бу үөрэххэ сылдьан бэрт элбэҕи-туһалааҕы эбиннибит. Улууспутугар волонтерскай үлэни хайдах тэрийэн ыытарга сыһыаннааах элбэҕи биллибит. Бу билиибит Ньурбаҕа 2027 с. СӨ норуоттарын IX Спортивнай Оонньууларыгар волонтерскай үлэни тэрийэн ыытарбытыгар көмөлөөх буолуоҕа дии саныыбын. Өссө даҕаны бириэмэ баар, онон салгыы үөрэнэн, бэлэмнэнэн иһиэхпит».
Геннадий АНТОНОВ.