2024 сыллаахха «Хаӊалас нэhилиэгин уопсастыбаннай инициативалары ѳйүүр киин» (АНО «Центр поддержки общественных инициатив Кангаласского наслега») «Ыччат коррупцияны утарар!» бырайыагынан Ил Дархан гранын ылбыта. Ахсынньы 20 күнүгэр, С.С.Потапов аатынан Убайаан орто оскуолатыгар бырайыагы түмүктүүр тэрээhин, Ньурба куустатын ыччатыгар аналлаах семинар буолан ааста.
Тэрээhиҥҥэ Убайаан, Сүлэ, Дьиикимдэ, Күндээдэ, Антоновка, Ньурба элбэх хайысхалаах гимназията, Ньурбатааҕы техническэй лиссиэй, Ньурба 2 №- дээх оскуолатын үрдүкү кылаас оҕолоро, барыта холбоон 100-тэн тахса оҕо, муhуннулар.
Семинары бырайыак салайааччыта Антонова Елена Никитовна аста.Коррупция диэн тугун, историятын билиһиннэрдэ, виртуальнай музей көрдөрдө. Ньурба оройуонун ИДьМ начальнигын солбуйааччыта, подполковник Денисов Дмитрий Олегович үүнэр көлүөнэҕэ коррупция уонна билиҥҥи кэм куһаҕан көстүүлэрин туһунан иһитиннэрдэ, аһаҕас кэпсэтиини ыытта.
Ол кэннэ Ньурба оройуонун дьарыктаах буолуу киинин инспектора Тихонова Виктория Васильевна оҕо сайыҥҥы сынньалаҥын туhунан иhитиннэрии онордо. Семинар кэмигэр “Ыччат коррупцияны утарар” оройуоннааҕы айар үлэ күрэҕин түмүгэ таҕыста, кыайыылаахтар грамотанан, сыаналаах бириистэринэн наҕараадаланнылар. Хаҥалас оскуолатын иитии өттүгэр дириэктэри солбуйааччыта Васильева Анна Владимировна коррупцияҕа, правовой билиигэ сыһыаннаах олус интэриэһинэй оонньуу ыытта.
Бу семинарынан бырайыакпыт сүрүн тэрээhиннэрэ түмүктэннилэр. Бырайыак устата үгүс көрсүhүүлэр, кылаас чаастар, айар күрэх, семинардар ыытылыннылар. Бырайыакпытыгар өйөбүл, көмө буолбут тэрилтэлэрбитигэр, СӨ Ил Дарханын иһинэн коррупция хабааннаах уонна да атын быраабы кэһиилэри сэрэтэр управлениеҕа, Ис дьыала министиэристибэтин Ньурбатааҕы отделыгар, Ньурба оройуонун үөрэҕириитин управлениетыгар, Ньурба оройуонун ыччат уонна имиджевай политика управлениетыгар, Хатыы кулуубугар, Хатыы, Убоян оскуолаларыгар бырайыак хамаандатын уонна Н.И.Кочнева аатынан Хаӊалас орто оскуолатын аатыттан барҕа махталбытын тиэрдэбит.
«Ыччат коррупцияны утарар!» бырайыак тэрээһинигэр эдэр ыччат куһаҕан дьайыыларга сыстыбатын, туора турарын туһугар сыаллаах барда. Инникитин эдэр ыччаппыт коррупцияны утарар дьиҥнээх патриот буолалларыгар эрэнэбит.
«Ыллык» пост,
Хаҥалас-Ньурба