VIII төгүлүн ыытыллар норуоттар икки ардыларынааҕы «Азия оҕолоро» сайыҥҥы оонньууларын уота Өлүөнэ очуостарын тэллэҕэр сиэрэ-туома оҥоһуллан уматыллан, уот эстэпиэтэ «Азия оҕолоро» оонньуулары төрүттээччи, СӨ Бастакы Бэрэсидьиэнэ Михаил Николаев төрөөбут Хаҥалас улууһуттан факелы күөрэччи көтөҕөн Саха сирин устун алгыстаах айанын саҕалаан, ытык-мааны Ньурбабыт чэлгийэ сайдар Үөдэй сиригэр тиийэн кэлбит дьоһун түгэнин туоһулара буолар дьоро күн буолла.Бу күн Үөдэй кырачаан оҕолоро Азия оҕолорун оонньуутун былааҕын тутан, эдэр ыччаттара киэргэнэн кэлэн тэрээһини сэргэхситтилэр.
2024 сылга Саха Өрөспүүбүлүкэтигэр Оҕо саас сылынан биллэриллибитэ. Бу сылга саамай бэлиэ уонна чаҕылхай түгэнинэн «Азия оҕолоро» VIII норуоттар икки ардыларынааҕы спортивнай Оонньуулар буолуохтара. Самаан сайыммыт силигилээн турар кэмигэр Оҕо саас, Спорт уонна Эйэ өйдөбүллэрэ күөрэччи тутуллан, Сахабыт сирин, Арассыыйа уонна аан дойду олоҕор ураты сүүрээни киллэриэхтэрэ. Бар дьон бүттүүн оҕолорбут спортка күөн көрсүһүүлэрин үөрэ, долгуйа кэтиэхпит. Онон билиҥҥи чэпчэкитэ суох кэмнэргэ үчүгэй тыыннаах, сырдык эйгэлээх тэрээһин ыытыллаары турара кэрэхсэтэр уонна олус күүтүүлээх.
Ньурба ньургун дьонноох сирин талба талыы кырдалыгар үктэммит ытык-мааны ыалдьыттарбытын өбүгэлэрбит үтүө үгэстэринэн Үөдэй, Хаҥалас далбар хотуттара саамал кымыһынан, арыылаах алаадьынан айах тутан күндүлээтилэр.
Киэҥ Ньурба, күөх Ньурба дьоллоох туонатыгар “Азия оҕолоро” оонньууларын аалай уотун Үөһээ Бүлүү Муниципальнай оройуон социальнай боппуруоска баһылыгы солбуйааччы Анна Уларова туттарда.
Эрчимнээх, успуорду, чөл олоҕу өрө тутар, талааннаах оҕолорбутун быстыбат уһун тыынныыр, үйэлэргэ үрдук күүстүүр, кэхтибэт кэскилин кэҥэтэр уйгулаах уоппутугар уруй-туску!Үлүскэн үөрүүүбүтүн үллэстэн, эҕэрдэ сайаҕас тылларын этэр, дьоро күммүтүгэр
Ньурба оройуона Муниципальнай оройуон баһылыгын социальнай боппуруостарга солбуйааччыта Наталья Петрова
Ньурба Улууһун Сүбэтин бэрэссэдээтэлэ Нюргуяна Михайлова тыл эттилэр.
Спорт эйэ уонна доҕордоһуу аатыгар дьону түмэр “Азия оҕолоро” VIII оонньуулар уотун эстэпиэтэтэ Өрөспүүбүлүкэбит бары улуустарын кэрийэн, бэс ыйын 26 күнүгэр Дьокуускайга кэлэн “Азия оҕолоро” оонньууну арыйыа. VIII норуоттар икки ардыларынааҕы спортивнай Оонньууларыгар Уруй-Айхал!!!
Үөрүүлээх тэрээһин бары хаартыскаҕа түһүүнэн түмүктэннэ. Салгыы уот Ньурба куоракка айаннаата.
Тэрээһини Маар кулуубун дириэктэрэ Сардана Петрова уонна Үөдэй кулуубун худруга Марфа Фёдорова иилээн-саҕалаан ыыттылар.
Надежда Аммосова видеоҕа устуута
Үөдэй нэһилиэгэ