Үөдэйдэр улахан кыһалҕалара быһаарылынна

Ааспыт сыл сэтинньи ыйыттан Үөдэйгэ саҥа биэлсэр Нюргустана Соловьева кэлэн үлэлии сылдьар. Онон уһун кэмҥэ медигэ суох олорбут нэһилиэк олохтоохторо тыын кыһалҕалара быһаарыллан, үөһэ тыыннылар.

«Нэһилиэкпитигэр өр кэмҥэ биэлсэрэ суох буолан эрэйи көрөр этибит, — диир нэһилиэк баһылыга Мария Пудовна Николаева. – Сылын аайы СӨ Бырабыыталыстыбатын отчуотун аайы туруорсарбыт. Урут «Нюрбинский доктор» диэн бырагырааманан кэлбит медик кыыс үлэлээн иһэн иккитэ оҕолонон, оҕолорун көрөн олорбута. Ааспыт сыл сэтинньи ыйыгар уурайан, Хаҥалас оскуола-саадыгар медигинэн киирдэ.

Улуустааҕы киин балыыһа саҥа кылаабынай бырааһа Артем Михайлович Ксенофонтов түргэнник тэрийэн, Үөдэй биэлсэрин боппуруоһун быһаарда. Онон кылаабынай бырааспыт хаһаайыстыбаннай киһи кэлбит диэхпин баҕарабын. Биһиги үрдүттэн биэлсэрдээх буолан абыранныбыт.

Нюргустана Соловьева Хаҥалас балыыһатын кытта биир ситимнээхтик үлэлиир. Ыарыһахтар ФАП-ка процедурнайга кэлэн анаалыс ханнык баҕарар көрүҥүн туттарар буоллулар. Биэлсэрбит Хаҥалас балыыһатын бырааһа анаабытынан систиэмэни кытта туруорар. Дьонтон сайаапка хомуйан Ньурбаттан эми таһааран атыылыыр. ФАП дьиэтигэр Интэриниэт суох, онон сибээс баар сиригэр баран, кассовай аппаратынан карточканан дьон төлүүр. Нюргустана Соловьева Дьокуускайга Мед-кииҥҥэ үлэлээбит уопуттаах медик, дьон медицинскэй дааннайдарын сып-сап, түргэнник көмпүүтэргэ киллэрдэ. Хаҥаласка баран эмиэ көмөлөһөр.

Биһиэхэ 10-тан тахса сыл устата медигэ суох олордубут, онон ФАП дьиэтэ кураанах кэриэтэ турбут буолан, балыыһа өттө итэҕэһэ-быһаҕаһа син-биир элбэх. Бастатан туран, Интэриниэт киирэ охсуон наада, сайаапка барбыта. Улуустааҕы киин балыыһа салалтата боппуруоһу уһаппакка быһаарыа диэн эрэнэбин.

Биэлсэрбит уопсай дьиэбит аҥарыгар олорор. Күннээҕи кыһалҕатын быһаарыыга нэһилиэк көмөлөһө олорор. Билигин аныгы медицинскэй оборудование уонна эмин харайарыгар холодильник наада эбит. Улуустааҕы киин балыыһа көмөтүнэн барыта ситтэҕинэ, биэлсэрбит үлэлииригэр үчүгэй буолуо этэ. Дьиэ электриката урут ыал олорорун курдук оҥоһуулаах, сааһыары медицинскэй оборудование холбоноругар сөптөөх буоларын курдук, электрикатын саҥардан оҥорторуохпут».

Биэлсэр Нюргустана Соловьева үлэ этэҥҥэ баран иһэрин, нэһилиэк уонна улуустааҕы киин балыыһа өттүттэн көмө, болҕомто мэлдьи баарын бэлиэтиир. «Саамай кыһалҕабыт – ФАП-ка Интэриниэт суох, онон эми атыылыырга күчүмэҕэйдээх. Вайфай түргэн соҕустук киирэрэ буоллар, нэһилиэнньэҕэ улахан көмө буолуо этэ», — диир кини.

Геннадий АНТОНОВ