Ааспыт нэдиэлэ бүтэһигэр Арассыыйаҕа — Аҕа дойдуну көмүскээччи, Саха сиригэр — Ийэ дойдуну көмүскээччи сылларын уонна Улуу Кыайыы 80 сылын чэрчитинэн, Ньурба к. «Кыталык» КД-гар «Кыайыы – барыбытыгар биир» куонкурус ыытылынна. Ол быһыытынан субуотаҕа оскуола иннинээҕи үөрэх тэрилтэлэрин, өрөбүлгэ оскуолалар хуорга кэлэктииптэрин куонкурустара тэрилиннэ.
Үлэһиттэрин ахсааныттан көрөн иккилии бөлөххө араарбыттар. Оҕо уһуйааннарын уонна оскуолалар үлэһиттэрэ үгүс түбүктээх үлэлэриттэн быыс булан, таҥастарыттан саҕалаан куоластарынан араарыыга тиийэ, хуорунан ыллааһын курдук уустук көрүҥҥэ элбэхтэ бэлэмнэммиттэрэ көстөр. Сорохтор киэннэрэ аҥардастыы сыанаҕа тахсан хуордааһынынан муҥурдаммакка, инньэ тыйаатыр туруоруутугар майгынныыр. Маннык иккис төгүлүн ыытыллар тэрээһин көрөөччүлэргэ элбэх дуоһуйууну бэлэхтээтэ.
Көрүү-куонкуруһу СӨ үтүөлээх артыыһа, Ньурбатааҕы искусство оскуолатын дириэктэрэ Илья Николаев салайааччылаах дьүүллүүр сүбэ сыаналаата. Түмүк маннык буолла: оҕо уһуйааннарыгар бастакы бөлөххө (30-ка тиийбэт үлэһиттээхтэр) I миэстэ – Ньурба к. «Кыталык»; II – Ньурба к. «Родничок», III – Маалыкайдааҕы «Мичил» уһуйаан. 2-с бөлөххө (30-тан элбэх үлэһиттээхтэр) I – Ньурба к. «Малышок», II – Маалыкайдааҕы «Сардаҥа», III – Ньурба к. «Светлячок» уһуйаана.
Оскуолаларга бастакы бөлөххө (50-ҥа тиийбэт үлэһиттээхтэр) I миэстэ– Дьиикимдэ оскуолата, II – Ньурба 3 №-дээх оскуолата, III –Сүлэ орто оскуолата. Иккис бөлөххө (50-тан тахса үлэһиттээхтэр) I –Убайаан орто оскуолата, II –Марха орто оскуолата, III –Ньурба 2 №-дээх орто оскуолата.
Итини таһынан араас номинациялар кыайыылаахтара бэлиэтэннилэр. Оҕо уһуйааннарыгар бастакы бөлөххө: «Мультижанровой толоруу иһин» — «Күнчээн» (Маар); «Лирическэй толоруу иһин» — «Сарыал»» (Хатыы); «Бастыҥ репертуар» — «Туллукчаан» (Ньурба к.); «Бастыҥ ааптардыы репертуар» — М.Ф.Алексеев аатынан уһуйаана (Хатыҥ Сыһыы); «Уобараһы бастыҥ толоруу иһин» — «Туллукчаан» (Хорула); «Үгэстэри харыстааһын иһин» — «Мичээр» (Акана); «Тэхиничэскэй толоруу иһин» — С.П.Алексеев аатынан уһуйаан (Чаппанда); «Бастыҥ акапельнай хуор» — «Ымыычаан» (Чуукаар).
Иккис бөлөххө: «Бастыҥ репертуар» — «Лесная сказка» (Ньурба к.); «Бастыҥ солист» — «Биhик» (Антоновка); «Бастыҥ тэхиниичэскэй толоруу иһин» — «Аленушка» (Ньурба); «Инструментальнай арыаллааһын иһин» «Сардаана» (Ньурба к.); «Үгэстэри харыстааһын иһин» — «Кэскил» (Ньурба к.);, «Мультижанровой толоруу иһин» — «Ромашка» (Антоновка).
Оскуолаларга: «Бастыҥ солист» — Ньурбачаан оскуолата, «Бастыҥ инструментальнай арыаллааһын» — Ньурбатааҕы техлицей, «Бастыҥ лирическэй толоруу» — Өҥөлдьө орто оскуолата, «Бастыҥ репертуар» — Антоновка орто оскуолата, «Кыайыыга дьулуурун иһин» — Өҥөлдьө начаалынай оскуола-уһуйаана, «Эр дьон бырааттаһыылара» («Мужское братство») – Хатыы орто оскуолата, «Үгэстэри харыстааһын иһин» — Ст. Васильев аатынан Ньурбатааҕы элбэх хайысхалаах гимназия.
С.С.Потапов аатынан Убайаан орто оскуолатын дириэктэрэ Андрей Горбатов куонкурска кыайыылаах тахсыбыттарын кистэлэҥин маннык арыйда: Биһигини Ньурбатааҕы искусство оскуолатын үлэһитэ, биллэр хормейстер Надежда Афанасьевна Кириллова күүскэ дьарыктаата. Кылгас кэмҥэ эрчийэн, 3 куоласка арааран ыллатта. Куоласка арааран ыллатыы улахан үлэттэн тахсар, онон Надежда Афанасьевнаҕа истиҥ махталбын тиэрдэбин».
«Кыайыы – барыбытыгар биир» патриотическай ырыа куонкуруһуттан 115 тыһ. солк. хомуллан киирэн, улуустааҕы СВО фондатыгар ананна.
Геннадий АНТОНОВ