Соторутааҕыта дьон сынньалаҥын тэрийэр тэрилтэлэр уонна «Ньурба куорат» куораттааҕы поселение дьаһалтата биир санаанан аҕам саастаах дьон иллэҥ бириэмэлэрин сөпкө аттаран түмэр сыаллаах, куорат социальнай хайысхалаах тэрилтэлэрин кытта мунньахтаабыттара.
Инникини торумнаан, бүгүн, кулун тутар 12 күнүгэр «Кыталык» КД «Үһүс көлүөнэ оскуолатын» аһаҕас аан күнэ буолла.
Сарсыардаттан 55 үөһээ саастаах дьоҥҥо анаан Ньурбатааҕы кииннэммит балыыһа үлэһиттэрэ кэлэн хаан анализтарын ыллылар, сүрэх кардиограмматыгар түһэрдилэр, спирометрия бэрэбиэркэлээтилэр, биэлсэргэ көрдөрөн анкета толордулар.
Кэлбит дьон болҕомтотун тарта «Ньурба коллекционердара» түмсүү кэрэ бэйэлэх быыстапката, манна бааллар харчыттан саҕалаан, араас брошкалар, урукку туттар мал, матрешкалар, самовардар, кыптыыйдар, ручкалар, значоктар уо. д.а. экспонаттар. Коллекционердар боппуруостарга эппиэттээн, өр сыллары быһа муспут малларын туһунан кэпсээн дьон болҕомтотун тардан тэрээһини киэргэттилэр.
Бу аһаҕас ааҥҥа Ньурба куорат олохтоохторугар анаан-минээн кэлэн тренинг оҥордо Республиканскай уйулҕа киинин Ньурбатааҕы филиалын психолога Наталья Викторовна Петрачук, эти-сиини уһугуннарар хамсаныылары оҥоттордо Константин Афанасьевич Владимиров, Ньурба оройуонун үөрэх управлениетын исписэлииһэ, остуол тенниһин көрүҥэр республика чемпиона.
Эҕэрдэ тыллары эттилэр «Ньурба оройуона» МО баһылыгын социальнай боппуруостарга солбуйааччы Наталья Семеновна Петрова, Ньурба оройуонун бэтэрээннэрин Сүбэтин бэрэссэдээтэлэ Татьяна Прокопьевна Олесова, «Ньурба куорат» куораттааҕы поселение баһылыгын социальнай боппуруостарга солбуйааччы Изамира Федосиевна Семенова.
Салҕыы улахан саалаҕа семинар ыытылынна, ол курдук, Н.И.Харитонов-Николай Чуор аатынан “Кыталык” КД дириэктэрэ Самангади Базарсадаевна Дондокова кулууптаах формированиеларын туһунан сырдатта, Ньурбатааҕы дьарыктаах буолуу киин салайааччыта Сахая Максимовна Столярова киинигэр баар араас куурустары билиһиннэрдэ, Ньурбатааҕы киин балыыһа биэлсэр-бырааһа Лариса Лукинична Гаврильева диспансеризация туһунан кэпсээтэ, Ньурба оройуонун ис дьыала отделын старшай лейтенана Никифор Никифорович Николаев интернет түөкүннээһин туһунан сырдатта.
Ньурба оройуонун кииннэммит библиотечнай систиэмэ үлэһитэ Рея Петровна Васильева аҕам саастаахтары кытта үлэ туһунан кэпсээтэ, Убайаан түөлбэ салайааччыта Саргылана Павловна Егомина түөлбэ олоҕун сырдатта, Ньурба куорат бэтэрээннэрин Сэбиэтин бэрэссэдээтэлэ Егоров Виктор Николаевич уонна солбуйааччыта Петрова Розалия Дмитриевна түмсүүлэрин үлэтин билиһиннэрдилэр.
Анна Прокопьевна Абишева эмтээх оттор туһаларын туһунан бэрт өйдөнүмтүөтүк кэпсээн тиит хатырыгыттан морс боруобалатта уонна түмүккэ Светлана Николаевна Данилова эмтээх оттор туһаларын туһунан сырдатта.
Араас маастар-кылаастар, остуол оонньуулара «хабылык-хаамыска», дуобат, дартс, корн-холл диэн бэрт интэриэһинэй саҥа сүүрээн күн былаһын буолла. Иис куруһуогун, «кыбытык» тигии ньыматын үллэһиннэ СӨ уонна Ньурба оройуонун уус-уран оҥоһуктарын маастара Алексеева Мира Никитична, илиинэн уус-уран оҥоһуктарга маастар-кылааһы ыытта СӨ уонна Ньурба оройуонун уус-уран оҥоһуктарын маастара Афанасьева Екатерина Егоровна.
Үҥкүү кэрэ эйгэтигэр үөрэттэ СӨ култууратын туйгуна Варвара Георгиевна Плотникова.
Маны таһынан ким баҕалаах бильярдка, остуол тенниһигр холонон көрдүлэр. Түгэнинэн туһанан 55 үөһээ саастаах үһүс көлүөнэ оскуолатыгар хапсар эрэ дьон буолбакка, биһиэхэ, ким баҕалаах “Кыталык” КД доҕотторгутун илдьэ кэлэн, үөлээннээхтэргитин кытта бииргэ алтыһан, бириэмэҕитин туһалаахтык атаарыҥ диэн ыҥырабыт.
«Кыталык» КД