Кулун тутар 7 күнүгэр, “Кыталык» култуура дыбарыаһыгар Аан дойдутааҕы Дьахталлар күннэригэр анаан улуустааҕы Дьарыктаах буолуу киинэ «Кэрэли» дьахтар кулууба кыттыылаах куорат дьахталларыгар анаан быыстапка тэрийдэ. Улуустааҕы киин балыыһа кэрэ аҥаардар хаан баттааһыннарын, саахардарын, холестериннарын, харахтарын бэрэбиэркэлээтилэр. Кэрэ аҥаардар маастар-кылаас ыыттылар.
🌹🌹🌹Аан дойдутааҕы Дьахталлар күннэринэн куорат дьаһалтатын баһылыга Геннадий Игнатьев, Урбаан, эргиэн уонна олохтоох оҥорон таһаарыы департаменын салайааччыта Михаил Пан, улуустааҕы Дьарыктаах буолуу киин салайааччыта Сахая Столярова эҕэрдэлээтилэр. «Кыталык» култуура дыбарыаһын эр дьонноро ылбаҕай ырыа бэлэх ууннулар.
Н.Н.Чусовской аатынан Антоновка орто оскуолатын 8 кылааһын үөрэнээччилэрэ тест Люшера тэрийэн ыыттылар.
Бүгүҥҥү тэрээһиҥҥэ кэлбиттэр эдэр ийэлэр оҥорбут сонун оҥоһуктарын кытары билистилэр, хамаҕатык атыыластылар, аҕам саастаахтар үлэлэрин сэргии көрдүлэр.
Куорат түөлбэлэрин кэрэ аҥаардара параадтаан тахсан хаамтылар, Арассыыйа Президенин В.В.Путины өйүүллэрин биллэрдилэр.
Улуустааҕы Дьарыктаах буолуу киин салайааччыта Сахая Максимовна Столярова:
🌹🌹🌹-Аан дойдутааҕы Дьахталлар күннэригэр кииҥҥэ учуокка турар үлэтэ суох дьахталларга анаан «Кэрэли» дьахтар кулуубун тэрийдибит. Кулууп үлэтин сыала-соруга: үлэтэ суох дьахталларга үлэ булан биэрээһини сэргэ анал дьайыыга сылдьааччылар дьиэ кэргэннэригэр, олох очурдарыгар түбэспит ийэлэргэ ананар. Кулууппутун презентациялаатыбыт. Бүгүҥҥү тэрээһиҥҥэ «Сайдам тыл» түмсүү салайааччыта Татьяна Александрова, «Норуоттар доҕордоһуулара» түмэл бибилэтиэкэрэ Юлия Васильева, Ньурба к. уопсастыбаннай эйгэлэрин сайыннарыыга Дириэксийэтин салайааччыта, куорат уопсастыбанньыга Саргылана Седалищева үлэлэстилэр, «Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо көмөнү оҥоруу комплекснай киин» социальнай педагогтара Мария Филиппова уонна Айталина Петрова бэйэни билиһиннэрии тренинг ыыттылар.
Кулууп быйылгы былаанын билиһиннэрэр буоллахха, кэрэ аҥаардарга анаан маастар-кылаастары ыытыахпыт, уйулҕа идэлээхтэри, тэрилтэ салайааччыларын кытары көрсүһүүлэри тэрийиэхпит.
Үлэ миэстэтинэн хааччыйыы тэрээһинигэр В.А.Петрова аатынан Ньурбатааҕы улуустар икки ардыларынааҕы Кырдьаҕастар уонна инбэлииттэр интэринээт -дьиэлэрэ, «Байар» кэпэрэтиип, улуустааҕы киин балыыһа, Нефроклиника, «Россельхозбаан», киин бухгалтерия, улуустааҕы үөрэҕирии салаата кыттыыны ыллылар. Бүгүҥҥү тэрээһиммитигэр кыттыбыт ИП Спиридонова Е.Г., Ким Л.Л. махталбытын биллэрэбит.
Түгэнинэн туһанан Ньурба кэрэ аҥаардарын Аан дойдутааҕы Дьахталлар күннэринэн эҕэрдэлиибин!🌷🌷🌷-Сахая Максимовна эҕэрдэнэн түмүктээтэ.
Антонина Семенова