1970 сылтан Аан дойдутааҕы көрбөттөр федерацияларын быһаарыытынан алтынньы 15 күнүгэр Аан дойдутааҕы Көрбөттөр күннэрэ биллэриилибитэ. Быйыл 53-с төгүлүн бэлиэтэнэр.
«Үрүҥ торуоска» декада сылын аайы ыытыллар тэрээһин харахтарынан көрбөт, эбэтэр мөлтөхтүк көрөр доруобуйаларынан хааччахтаах дьоҥҥо уопсастыба болҕомтону уурарыгар, көрсөр кыһалҕаларын өйүүрүгэр, инникигэ эрэли үөскэтиигэ туһуланан ыытыллар.
Ньурбаҕа быйыл «Үрүҥ торуоска» декада саҥалыы, уратытык тэриллэн барда. Оройуон дьаһалтатын «Ньурба LIVE» ютуб-каналга улуус баһылыгын социальнай боппуруостарга солбуйааччы Наталья Петрова кыттыылаах быһа эфиргэ социальнай харалта управлениетын салайааччыта Ирина Находкина, киин балыыһа кыл.бырааһа Наталья Павлова, 15 №-дээх Бюро Ньурбатааҕы филиалын бырааһа Валентина Афанасьева уонна улуустааҕы үөрэх управлениетын эбии үөрэхтээһин отделын салайааччыта Сардана Васильева кыттыыны ыланнар, соцконтракт, доруобуйаларынан хааччахтаах дьон доруобуйаларын туруктарын көрдөрүнэллэригэр сыһыаннаах араас боппуруостарга эппиэттээтилэр.
Улуустааҕы дьиэ кэргэн бэлиитикэтин социальнай отделын сүрүннүүр исписэлииһэ Анжелика Никифорова салалтатынан бөлөх тэриллэн, сырыы олохтонон суол хаайтарыктаах Күндээдэ нэһилиэгиттэн ураты кусталарынан араарыллан Октябрьскай, Чаппанда, Түмүк, Маалыкай нэһилиэктэринэн социальнай харалта исписэлииһэ Лариса Андреева, көрбөттөр уопсастыбаларын бэрэссэдээтэлэ Светлана Яковлева, 15 №-дээх Бюро Ньурбатааҕы филиалыттан Наталья Семенова, Ньурбатааҕы киин балыыһа кыл.бырааһын солбуйааччыта Николай Анисимов, улуустааҕы дьарыктаах буолуу кииниттэн Надежда Тихонова уонна «Мои документы» офис исписэлиистэрэ консультация ыыттылар, кыаммат, сытар ыарыһахтарга дьиэлэригэр сылдьан дьиэтээҕи усулуобуйаларын көрдүлэр-иһиттилэр, миэстэтигэр аһымал аахсыйа тэрийдилэр. Маастар-кылаастар, остуол оонньуутугар хабылыкка, хаамыскаҕа күрэхтэһиилэри тэрийэн ыытан тэрээһиннэр сэргэхтик астылар.
Сэтинньи 15 күнүгэр Н.И.Харитонов-Николай Чуор аатынан «Кыталык» култуура дыбарыаһыгар декаданы түмүктүүр тэрээһин саҕаланыытыгар Иван Горнай тылларыгар, Татьяна Неустроева матыыбыгар «Сүрэхпинэн көрөбүн» диэн ырыаны «Кыталык» култуура дыбарыаһын үлэһиттэрэ Айана Антонова уонна Валерий Платонов толорууларын кэлбит дьон ис дууһаларынан иһиттилэр.
Улуус баһылыгын социальнай боппуруостарга солбуйааччы Наталья Петрова тыл эттэ, тэрээһиннэргэ көхтөөх чилиэннэригэр, бочуотунай грамоталары, махтал суруктары туттартаата. Көрбөттөр уопсастыбаларын бэрэссэдээтэлэ Светлана Яковлева тэрээһиннэр үрдүк таһымнаахтык барбыттарыгар улуус дьаһалтатыгар, нэһилиэктэртэн чуолаан Октябрьскай нэһилиэк (Корякин С.А.) дьаһалтатыгар махтанарын биллэрдэ. Көрбөттөр уопсастыбалара тэрийбит хаартыска күрэҕин түмүгүн таһааран, кыттыбыттарга махталы суруктары туттартаата. Харахтарынан мөлтөхтүк көрөр дьоҥҥо аналлаах ГИБДД ыытар суол быраабылатын тутуһуу тэрээһинигэр кыттан листовка тарҕаппыттарын, салайааччы Прокопьев Николай Владимировичка махталын биллэрдэ Улуустааҕы дьиэ кэргэн бэлиитикэтин социальнай отделын сүрүннүүр исписэлииһэ Анжелика Никифорова нэһилиэктэринэн сырыыны кэпсээтэ. «Үрүҥ торуоска» тэрээһиҥҥэ уопсайа 200 киһи кыттыбытын бэлиэтээн эттэ.
Бу күн остуол оонньуутугар хабылыкка хаамыскаҕа маастар кылааһы Марина Ли тэрийэн ыытта, киин балыыһаттан офтальмолог быраас Айталина Степанова пациеннары көрдө-иһиттэ. Тэрээһиҥҥэ ыҥырыллыбыт исписэлиистэр кэлбит дьон ыйытыктарыгар хоруйдаатылар. Ордук нэһилиэктэртэн киириигэ бырайыас сыанатын үрдүгүн, реабилитацияны барыыга, уод.а. боппуруостары туруорустулар.
Сиһилии «Ньурба» хаһыат кэлэр нүөмэригэр ааҕыҥ.
Антонина Семенова