Балаҕан ыйын 10-11 к. ыытыллыбыт улуустааҕы үөрэх үлэһиттэрин сүбэ мунньаҕа «Доруобуйаны харыстыыр технологиялар үөрэх хаачыстыбатын ресурсатын быһыытынан» диэн тиэмэҕэ ананна.
Балаҕан ыйын 11 к. «Кыталык» КД-гар улуустааҕы үөрэх үлэһиттэрин балаҕан ыйынааҕы сүбэ мунньаҕын пленарнай чааһыгар улуус баһылыга Алексей Иннокентьев киэҥ ис хоһоонноох дакылаата истилиннэ. Алексей Михайлович ааспыт үөрэх дьылын түмүктэрин ырытта уонна үөрэх эйгэтигэр турар инники соруктарга тохтоото. Саҥа үөрэх дьылыгар 5 сүрүн суолталаах хайысха турарын ааттаата: үөрэх хаачыстыбатын үрдэтии; үөрэнээччилэри идэҕэ хайысхалаан хас биирдии оскуола 1-2 профильнай хайысханан үлэлээһиннэрэ; каадырынан хааччыллыы уонна муниципальнай «Эдэр педагог оскуолатын» үлэлэтии; патриотизм уонна спорт; үөрэх тэрилтэлэрэ бырайыактыыр үлэҕэ көхтөөхтүк кыттан граҥҥа тиксэн үбү-харчыны тардыылара.
Баһылык оскуолалар граҥҥа кыттыыларын көҕүлүүр инниттэн уонна агро-оскуолалар үлэлэрин сэргэхситэр соруктаах рейтинг систиэмэтэ быйылгыттан олоххо киирэрин бэлиэтээтэ. Итини таһынан оскуолаларга оҕолору аһатыыга, тыа сиригэр аҕыйах оҕолоох оскуолалар кыһалҕаларыгар, эдэр учууталлар Ассоциацияларын үлэлэригэр, Ньурбатааҕы «IT-куб» улуустааҕы норуот хаһаайыстыбатын салаата сайдарыгар туһуламмыт чопчу үлэни ыытарыгар чопчу соруктары туруорда. Баһылык биирдии оскуолаларынан кинилэр үлэлэригэр хайысха биэрбитин үөрэх үлэһиттэрэ сэргии иһиттилэр.
Алексей Иннокентьев бу күн улуус бастыҥ үлэлээх элбэх педагогтарыгар наҕараадаларын туттарда. Ол иһигэр «Кэскил» уһуйаан дириэктэрэ Анна Николаевна Иванова – «РФ үөрэҕириитин туйгуна», Маар орто оскуолатын нуучча тылыгар уонна литератураҕа учуутала Изабелла Николаевна Васильева – «Идэтигэр бэриниитин иһин», «Туллукчаан» уһуйаан бэтэрээнэ Федора Степановна Никифорова — «СӨ бочуоттаах ытык кырдьаҕаһа» бэлиэнэн, «Земскэй учуутал» бырагыраама кыттыылааҕа, Маар оскуолатын химияҕа уонна биологияҕа учуутала Найдан Ай Кыс Александровна Махтал суругунан наҕараадаланнылар. СӨ норуоттарын IX Спортивнай оонньууларын пуондатыгар ботуччу үбү киллэрбит үөрэнээччилэр Андрей Татаринов (Антоновка орто оскуолата), Николай Егоров (Ньурба 2 №-дээх орто оскуолата) уонна Валерия Потапова (Ньурбатааҕы элбэх хайысхалаах гимназия) Махтал суругунан бэлиэтэннилэр.
СӨ үөрэх уонна наука министиэристибэтин куттал суох буолуутугар отделын кылаабынай исписэлииһэ Спартак Кононов үөрэх тэрилтэлэрин куттала суох буолууларын боппуруоһун таарыйда, бастыҥ үлэлээхтэргэ министиэристибэ наҕараадаларын туттарда.
Бүлүүтээҕи педагогическай колледж дириэктэрэ Алевтина Аргунова үөрэх эйгэтэ СӨ Ил Дарханын стратетическай ыйаахтарын олоххо киллэрсиигэ үлэтин-хамнаһын сиһилии сырдатта, өрөспүүбүлүкэҕэ профессионалитеты сайыннарыы туһунан кэпсээтэ.
«Кэскил» уһуйаан иитээччитэ Анна Дмитриева тэрилтэҕэ учуутал-логопед үлэтин туһунан билиһиннэрдэ. Улуустааҕы үөрэх салалтатын салайааччыта Федор Ушканов үөрэх эйгэтигэр барар үлэ-хамнас туһунан үгүс сыыппаралары аҕалан ырытта, инники соруктарга тохтоото.
Улуус оскуолаларыгар саҥа үлэлии кэлбит учууталлары сыанаҕа ыҥыран таһааран үтүө алгыс тылларын анаатылар, сэмэй бэлэхтэри туттардылар.
Улуус үөрэҕин үлэһиттэрин сүбэ мунньаҕын чэрчитинэн үөрэх тэрилтэлэрэ, ол иһигэр агро-оскуолалар үлэлэрин-хамнастарын көрдөрөр быыстапканы туруордулар. 2 күннээх сүбэ мунньахха үөрэнээччилэр уонна үлэһиттэр эт-хаан уонна уйулҕа өттүнэн доруобуйаларын харыстааһыҥҥа барар үлэ, оскуолаларга уонна уһуйааннарга куттала суох үөрэх быраактыкаларын уонна табыгастаах эйгэни үөскэтии туһунан сиһилии дьүүллэстилэр. Бүлүүтээҕи педколледж, Ньурбатааҕы техникум, улуустааҕы киин балыыһа бэрэстэбиитэллэрэ кыттыбыттара кэпсэтиини киэҥ хайысхалаата. Сүбэ мунньах түмүгүнэн элбэх пууннаах рекомендация ылылынна. Улуустааҕы киин балыыһа Ст. Васильев аатынан Ньурбатааҕы элбэх хайысхалаах гимназияҕа үөрэх үлэһиттэригэр диспансеризация ыыттылар.
Геннадий АНТОНОВ