Балаҕан ыйын 5 күнүгэр Өҥөлдьөҕө “Старт Марха 2.0” диэн эдэр дьону тыа сиригэр үлэлэтэ аҕалар, олохсутар сыаллаах эдэр ыччат форума иккис сылын буолла. Быйылгы тэрээһиҥҥэ 6 нэһилиэктэн барыта 70 эдэр дьон мустан араас хайысхаҕа үлэлээтилэр.
Күн бастакы аҥаарыгар Өҥөлдьөттөн төрүттээх, киэн туттар биир дойдулаахтарбыт буойун-поэт Алексей Афанасьевич Софронов уонна Социалистическай үлэ Геройа Михаил Федорович Алексеев сырдык ааттарын үйэтитэр сыаллаах Тэҥкэ түбэтигэр өйдөбүнньүк дуоска арыллыыта буолла. Инникитин бу сиргэ күрүө-хаһаа тутан тупсарыы үлэтэ ыытыллыахтааҕын туһунан баһылык Андрей Павлов иһитиннэрдэ.
Салгыы оскуолаҕа стратегическай сиэссийэҕэ мустан эдэр дьон ыҥырыылаах ыалдьыттары кытта атах тэпсэн олорон сэһэргэһии форматтаах үлэҕэ кытыннылар. Ол курдук, Хатыы баһылыга Леонид Николаев, РФ Федерация Сэбиэтин эдэр сокуону оҥорооччулар палаталарын чилиэнэ Валерия Владимирова Ньурбатааҕы доҕордоһуу түмэлин үөрэх салаатын салайааччыта Александра Иннокентьева, “МТС Ньурба-Агро” эдэр үлэһитэ Гаврил Тимофеев уонна мин кытынныбыт.
“Олус интэриэһинэй Бырайыактыыр полигон диэн былаһааккаҕа форум кыттыылаахтара хамаандаларга арахсан үлэлээтилэр. Ол курдук, тыа сирэ сайдар суолун тобулар бырайыак оҥорон көмүскээтилэр. Инниктин бу саҕалааһыннарын бэйэлэрин үлэлэригэр туһаныахтара диэн эрэнэбит», — диэн тэрийээччи Марха нэһилиэгин баһылыгын солбуйааччыта Анастасия Аммосова үллэһиннэ.
Өҥ буордаах Өҥөлдьө сиригэр кэлбит ыалдьыттар бары олохтоох дьаһалта тэлгэһэтигэр эрдэттэн түөрэн аҕалан бэлэмнээбит мастарын олортулар, онон көҕөрдүү үлэтигэр кыттыстылар. Инникитин кэлэ-бара ”бу биһиги олордубут маспыт” диэн көрө-истэ сылдьыахтара буоллаҕа.
Лена ПЕТРОВА